جديد أحمد فؤاد نجم للرئيس مبارك

اضيف الخبر في يوم الخميس 07 يناير 2010. نقلا عن: إنقاذ مصر


جديد أحمد فؤاد نجم للرئيس مبارك

 

7th January

نؤيد سيادتك لفترة جديدة
نكمل خلالها المسيرة السعيدة
و بالمرة فيها نبيع الحديدة
مفيش حاجة تانية نبيعها خلاص
نؤيد سيادتك لأجل المزيد
من اللي تحقق بفضلك أكيد
بقينا خلاص ع الحميد المجيد
و ربك لوحده فى ايده الخلاص
نبايع سيادته ولا حد غيره
كفايا علينا نبرطع في خيره
ونوم شعب مصر العظيمة و شخيره
يقول للحرامي ما تسرق كمان

نبايع سيادته وابنه وحفيده
مفيش زي فكره قديمه و جديده
خرابك يا مالطة حيحصل بايده
ومين فيكي يعني بيسمع آذان

نبوس ايد سيادتك و رجلك كمان
تخليك معانا يا ريس عشان
وجودك ضرورة فرضها الزمان
و من غير وجودك حقيقي ! نضيع
دي مصر بتاعتك واحنا ضيوفك
كفايا علينا يا ريس نشوفك
و عاذرين سيادتك و فاهمين ظروفك
عليك بس تؤمر واحنا نطيع
في جزمة سيادتك كلابك يبوسوا
و فوق الغلابة بجزمهم يدوسوا
و شعبك ليلاتي يا ريس غموسه
مذلة و مهانة و حوجة و مر

لكن يعني ما دمنا شعب انتساب
و دايما وأبدا فى حالة غياب
متعملش لينا ياريس حساب
دي عزبة سيادتك وفيها أنت حر
و دستور ما دستورشى مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا و معشش وضارب جذوره
و ايه يعني تهري جتتنا البلاوي
يوماتي كوارث، فضايح، رشاوي
كفايا علينا القعاد في القهاوي
بنستنى لما الوريث ييجي دوره

 

اجمالي القراءات 4513
التعليقات (2)
1   تعليق بواسطة   عبدالمجيد سالم     في   الخميس 07 يناير 2010
[44750]

التأييد على مذهب أحمد فؤاد نجم .. قوة البطش أم بطش القوة ..

من المؤكد ان الكثيرين يؤيدون مبارك على مذهب أحمد فؤاد نجم ، مذهب أحمد فؤاد نجم هو ملاذ المصريين الأخير لكي يتعاملوا مع الوضع المفروض بقوة البطش وبطش القوة ..  أسجل أعجابي بأحمد فؤاد نجم كمعبر عن الوضع الحالي في مصر التي نتمنى لها أن تخرج من كبوتها ..

2   تعليق بواسطة   ليث عواد     في   الخميس 07 يناير 2010
[44765]

أحمد فؤاد نجم

فؤاد الغلابا الخافق بمأسيهم و النابض بخلجات صدورهم. دمهم يجري  في عروقه و يتريث فيه، خوفهم جذر عذاباته و فرحهم مزن  تروي  صباره. نجم من ضلّ دربه و من كسف بدره و من طفأ شهابه فغابت عنه شراعات المهد و أسقط من يده البخور و الذهب. أنا أحفظ لك المكان فأنت ضمير مصر و ضمير من بقي على العهد الذي كان، فلا أرهبه سيف دجال و  لا زورته عتمة الظلم.


و يا عم نجم ،يا بختك صبرت


لا الفقر ضرّك ولا الجاه  سرّك


دايما عحالك مايهدلكش خاطر و ما تخفش الهلاك


 يارب  يخليك و تقبر عدوك  و ترجع شباب


و ترجع و لو صار والينا ملاك


بألفين جناح،  و لو ريشة طارت


تسل ليه سيوفك و تبري الحراب


حياتك ياسيدي  مادام فينا خايف


عذاب في عذاب    


أضف تعليق
لا بد من تسجيل الدخول اولا قبل التعليق