أعجبنى برنامج الحملة لزواج المسلمة من غير المسلم ، وانا اكتب لك فى موضوع مختلف لكن تشجعت بالحملة دى عشان اكتب لك. أنا قابلتك فى مؤتمر شيكاغو عن الأقباط وعارف اهتمامك بالدفاع عنهم ومكانتك كبيرة عندنا . انا بأحكى تجربتى لمجرد الاستفادة. عندى ولدان معايا فى أمريكا . جمعت كل مدخراتى واشتريت بيت بمليون دولار ، ودفعت ربع الثمن والباقى أقساط شهرية كالمعتاد. وجوزت ابنى الكبير والتانى من مصر ، وكل واحد منهم عاش فى دور من البيت ، وأنا ومراتى فى الدور الأرضى . وقلت أقعد آخر حياتى وانا على المعاش مع ولادى وأحفادى . لكن اللى حدث خيبة كبيرة. مراة ابنى الكبير دخلت فى مشاكل مع سلفتها مرات ابنى الصغير ، وبقت الحياة لا تحتمل ، وفى الاخر كل واحدة خدت جوزها لولاية تانية ، وسابونى ومراتى وحدنا فى البيت . اضطريت ابيع البيت عشان أخلص من الاقساط . وباعيش انا ومراتى فى شقة صغيرة بالايجار ، واولادى ضاعوا منى وحتى نسيوا يتصلوا يتطمنوا على . وكل ده من نسوانهم اللى أنا جبتهم من مصر عشان فكرت انهم احسن ما اولادى يتجوزوا أمريكان . انا دلوقتى عايش فى آخر عمرى فى خيبة قوية ، وبأنصح أى واحد مهاجر ما يتجوزش من بلده الاصلية . بتيجى متعقدة وعندها عقد نقص ومتخلفة ، وتسيطر على جوزها من خوفها انه يسيبها .