ابويا الله يرحمه بقى كان غنى وصاحب عمارة وموظف كبير فى الحكومة ، لكن كان بخيل ، عيشنا فى الفقر ، وأمى كانت أبخل منه ، حرمونى فى طفولتى من كل حاجة أشوفها مع الاطفال اللى فى سنى. أختى الوحيدة اكبر منى بعشر سنين وهى ابخل من ابويا وامى . تخرجت وبقت محامية ، ومتفرغة لرفع قواضى على السكان فى عمارتنا ومتخصصة فى الأذية . عشت معاهم محروم ومكروه . مرة ابويا بعتنى اجيب الايجار ، لقيت فى ايدى حوالى ألف جنيه وميتين جنيه رحت لمطعم واكلت اللى فى نفسى وقلت يحصل الى يحصل . ابويا طردنى من البيت وعشت كام يوم عند عمى . وعرفت منه ان ابويا مقاطع أهله لانه بيحس انهم طمعانين فى فلوسه . وشفت عمتى اخت ابويا الشقيقة وتشبهه تمام وبكت لما شافتنى واخدتنى بالحضن ، وابويا كان مقاطعها عشان جوزها . تعودت ازور عمى وحبيت بنته الوحيدة بنت عمى ، وعمى وعدنى بالزواج إذا خلصت الجامعة ، وعشان خاطرها اجتهدت وخدت بكاريليوس التجارة بتقدير جيد . وابويا بالواسطة عينى فى شركة حكومية ، وبقى لى مرتب كويس فى اول تعيين . قلت لابويا ان انا عايز اخطب بنت اخوه رفض بشده ورفضت أمى واختى . وهددونى بالطرد من البيت . بت البيت وعشت مع عمى فى شقتهم ، وخطبت بنت عمى وابتدينا نجهز حجرة لنا فى شقتهم. وإتجوزنا وابويا وامى واختى قاطعونا فى الفرح وبعده . ثم عرفت ان ابويا مات فجأة . وجاء وقت توزيع الميراث . لقيت أبويا كتب كل ثروته باسم أختى المحامية عشان تحافظ على التركة وفرض عليها تعطينى مرتب شهرى . أنا إعترضت قالت لى اخبط راسك فى الحيطة . وقالت لى امى اشرب من البحر . اختى متعقدة وعشان كده بقت عانس فوق الاربعين سنةمن غير جواز ، العريس اللى كان يتقدم لها زمان تقول انه طمعان فى فلوسها . من زمان مفيش حد تقدم ليها وده زادها حقد على الناس . وزاد حقدها جوازى من بنت عمى اللى اصغر منها بعشرين سنة . دلوقتى انا عايز ميراثى اللى فى ايد اختى .. أعمل إيه ؟