هل ماء زمزم لما شُرب له؟

الحاج سعيد:

ألو ألو.. دكتورة سلوى؟

دكتورة سلوى:

مرحباً عمي الحاج، مساء الخير. نعم تفضل حضرتك اتصلت.. خير؟

الحاج سعيد:

إلحقينا يا بنتي، بنت عمك تعبانة أوي، وباين كريزة الكُلى جت لها المرة دي جامدة أوي.

دكتورة سلوى:

حاضر، ثواني وأكون عندكم.

.(وصلت الدكتورة وسألت)

مالك يا عائشة؟ إيه اللي حصل؟ أنت مش بتاخدي العلاج بانتظام ولا إيه؟

عائشة:

لا يا دكتورة باخد الدواء، وماشية على نظام الأكل كويس.. لكن مأخدتهوش إمبارح ولا النهاردة.

 الدكتورة سلوى:

(بغضب): ليه يا عائشة؟ لو خلص اتصلي بيّ أو ابعتوا حد يشتريه بسرعة وتاخديه بانتظام.

:(وهنا تدخل زوج عائشة، الشيخ أبو بكر خطيب المسجد، في الحوار قائلاً)

الشيخ أبو بكر:

أنا جبت لها معايا من الحرم (ماء زمزم)، وقلت لها اشربي منه وتوكلي على الله، وإن شاء الله ربنا هيجيب الشفاء على طول.

الدكتورة سلوى:

يا أبو بكر، قلت لك مليون مرة مالكش دعوة بالعلاج.. أنت عليك تاخدها للمستشفى وتدفع التحاليل والأشعة وثمن العلاج وخلاص.

الشيخ أبو بكر:

إيه يا دكتورة؟ ماء زمزم وردت فيه روايات أنه شفاء، وأنه طعام ودواء و(لما شُرب له)

الدكتورة سلوى:

أعمل فيك إيه بس؟  لما هو شفاء للأمراض، ليه أهل المنطقة وملوكها ومشايخ الحرم بيروحوا للدكاترة وللمستشفيات وبيسافروا يتعالجوا برة؟ وهل عشرات الملايين اللي بيروحوا يحجوا ويعملوا عُمرة كل سنة بيرجعوا صحتهم تمام 100% وشباب يعني؟

الشيخ أبو بكر:

إيه يا دكتورة، يعني هننكر الأحاديث التي وردت في ماء زمزم؟

الدكتورة سلوى:

سيبني أشوف شغلي وألحق مراتك الأول وبعد كده أفضى لك.. خدي يا بنتي العلاج ده، وشيلوا ماء زمزم ده على جنب خالص دلوقتي.

الشيخ أبو بكر:

نشيله ليه يا دكتورة؟ ده أنا جايبه معايا.. هشربه أنا؟

الدكتورة سلوى:

ماء زمزم الملوحة فيه عالية، ومراتك بتشتكي من أمراض في الكُلى وده خطر عليها، وإحنا ممشينها على نظام علاج عشان نحافظ على سلامة الكُلى وما ندخلش في متاهات. وأنت كمان.. أنت ناسي إنك ماشي بفوارات ومدرات بول؟ هو أنت اللي سليم؟

 الشيخ أبو بكر:

طيب والناس اللي بتشرب منه مدة الحج والعُمرة يعملوا إيه؟

الدكتورة سلوى:

بيشربوا فترة محدودة أيام، وبيشربوا خارج الحرم مياه معدنية أو مياه عادية من المسموح بالشرب منها في بيوتهم أو الفنادق.

الشيخ أبو بكر:

يعني الأحاديث دي غلط؟

الدكتورة سلوى:

سيبك من أنها صح ولا غلط، كل ما ورد فيه من روايات علاجية لا علاقة لها بالطب، ويجب أن نرفع المفاهيم غير العلمية عنه، وأن نتعامل معه على أنه ماء نابع من بئر مبارك ومصدر للمياه، لكن الشرب منه يكون بحذر شديد لارتفاع الملوحة فيه، ومرضى الضغط والكلى وأمراض القلب ممنوعون من التوسع في شربه.

الشيخ أبو بكر:

نحن نتبارك به وإحنا بنشربه، ووسيلة ليشفينا الله، والشافي هو الله.

الدكتورة سلوى:

البركة الحقيقية في الأخذ بالأسباب اللي ربنا خلقها، والاعتماد على الماء كدواء بيخلينا نعتمد على الوسائط وننسى مسبب الأسباب والأخذ بالعلم والطب.

الشيخ أبو بكر:

أنتم يا دكاترة عايزين تشتغلوا وخلاص!

الدكتورة سلوى:

حوش الفلوس اللي بتدفعها لنا ههههههه..

 شوف يا أبو بكر يا ابن عمي وزوج بنت عمي،

عايز الشفاء؟ يبقى بالدعاء المباشر لله رب العالمين، وتروح للدكتور وتسمع كلامه،

لأن ده يدخل في قواعد قرآنية لازم نعرفها ونمشي بيها، زي تطبيق قاعدة: ﴿وَأَمْرُهُمْ شُورَىٰ بَيْنَهُمْ﴾ وقاعدة: ﴿فَاسْأَلُوا أَهْلَ الذِّكْرِ إِن كُنتُمْ لَا تَعْلَمُونَ﴾، فالشورى هنا هي الذهاب للأطباء لمشورتهم، وأهل الذكر هم الأطباء والصيادلة وأصحاب التخصصات. وما تروحش للي بيبعوا الوهم للبسطاء بأنه دواء وعلاج لكل مرض.

عائشة::

ربنا يكرمك يا دكتورة، أنقذتيني من فتاوى أبو بكر اللي كانت هتخلص عليا.

الدكتورة سلوى::

اسمعي كلامي وكلام الدكاترة في علاجك وما تسمعيش أي كلام تاني.

ومن فضلك يا عم الحاج متخليش أبو بكر يمنعها من العلاج تاني، بكرة نلاقيه جايب لها زيت حبة البركة ومعلقتين كركم ويقول لها بلبعي دول وسيبك من الدواء ويضيعها مننا.

الحاج سعيد:

لا خلاص يا دكتورة، كانت غلطة وعدت على خير الحمد لله.

الدكتورة سلوى:

سلام، وتصبح على خير يا أبو بكر يا بتاع ماء زمزم ههههههههه.