طلعت فى إيدى غلط:
طلعت فى إيدى غلط

عثمان محمد علي في الأحد 04 فبراير 2007


طلعت فى ايدى غلط
وانا قاعد كافى خيرى شرى زى ما بيقولوا لقيت الباب بيخبط (باب الياهو ماسينجر بتاعى ) حاكم الإنترنت دى لا تعترف بحواجز ولا اوقات حرمه ولا قيلوله ولا حاجه خالص فجأه كده تلاقى الباب بيخبط ولازم تفتح وإلا تبقى مطنش الزبون ويزعل وترجع تراضيه وتخش فى مواويل .المهم ما علينا  بعد ما فتحت الباب .حصل الحوار الآتى ووجدت ان اعرضه على حضراتكم  لأهميته ولآنه عفوى مائه فى المائه وبكل صدق لم اكن انوى ان انشره ولكن قبل مأاقفل الباب بعد صديقى ما روح قلت اقرأ الحوار تانى  وبعدين لاقيته واضح انه مهم (على ألاقل من وجهة نظرى ) فقررت ان اشرككم فيه .وإفتكرت مسرحية فؤاد المهندس وشويكار اللى بتقول له فيها (طلعت فى أيدى غلط ) اهو كمان الحوار ده طلع  من صاحبه غلط وأسيبكم مع الحوار  وفى إنتظار تعليقاتكم  الجميله والظريفه ايضا ..
 4-2-2007
 
Ebraheem Ghazy: السلام عليكم
othman MOHAMMED: وعليكم السلام
Ebraheem Ghazy: انا ابراهيم غازى
othman MOHAMMED: من حضرتك
Ebraheem Ghazy: ايه اللى جابك عندى
: ايه اللى جابك عندى
othman MOHAMMED: اسف ممكن تفكرنى بحضرتك
Ebraheem Ghazy: ابراهيم غازى
othman MOHAMMED: حضرتك تعرفنى
Ebraheem Ghazy: طيب ماتشغلش بالك
Ebraheem Ghazy: حصل خير
othman MOHAMMED: انا يشرفنى معرفتك لكن مش فاكر حضرتك
Ebraheem Ghazy: م. ابراهيم غازى من الاسكندرية
Ebraheem Ghazy: مهندس كهرباء
othman MOHAMMED: اهلا وسهلا
Ebraheem Ghazy: اتشرف بيك
othman MOHAMMED: د- عثمان محمد على --مصرى مقيم فى كندا
Ebraheem Ghazy: فى كندا
Ebraheem Ghazy: اهلا بيك
othman MOHAMMED: صيدلى وباحث اسلامى
Ebraheem Ghazy: الله اكبر
Ebraheem Ghazy: ماشاء الله
Ebraheem Ghazy: فى إيه
Ebraheem Ghazy: ايه جاب ايميلك عندى
othman MOHAMMED: ما اعرفش حضرتك اللى دخلت على
Ebraheem Ghazy:باحث إسلامى فى إيه
othman MOHAMMED: فى الحريات العامه والدوله المدنيه وضد الدوله الدينيه والجماعات الدينيه
Ebraheem Ghazy: ضد الجماعات ليه
othman MOHAMMED: لأسبابكثيره
Ebraheem Ghazy: ومش ممكن تكون مستنير وتكون من جماعة
othman MOHAMMED: يعنى مع الحريات العامه والدوله المدنيه والديمقراطيه وضد الكهنوت الدينى  وانقده من داخل الإسلام نفسه
othman MOHAMMED: لا -طبعا الجماعات دايما  فكرههم متطرف وضد الإنسانيه كلها
Ebraheem Ghazy: طيب ممكن تكبر الخط شوية عشان نعرف نتكلم
Ebraheem Ghazy: ولا وراك شغل
Ebraheem Ghazy: اتكنى انى ما اعطلكش
othman MOHAMMED: ممكن   واضح انك من الجماعات
othman MOHAMMED: انا بالليل عندى الساعه 1-37
Ebraheem Ghazy: انا اتشرف انى اكون من الاخوان المسلمين
othman MOHAMMED: طيب .يبقى مش حنتفق من اولها
Ebraheem Ghazy: وسهران ليه
Ebraheem Ghazy: لا ممكن نتفق
othman MOHAMMED: بأكتب مقاله
Ebraheem Ghazy: بس لازم نتحاور
Ebraheem Ghazy: الاخوان جماعة معتدلة
othman MOHAMMED: اول مره اشوف واحد من الإخوان بيتكلم عن الحوار
Ebraheem Ghazy: مستنيرة على رأيك
Ebraheem Ghazy: وهو ال 88 عضو فى مجلس الشعب داخلين يتعاركو
othman MOHAMMED: مستنيره بأمارة التنظيم الخاص
Ebraheem Ghazy: ولا يتحاورو مع الحكومة
Ebraheem Ghazy: التنظيم الخاص كان ايام الاحتلال
Ebraheem Ghazy: الآن فيه عمل علنى
othman MOHAMMED: حنبتدى نغير الحقائق اهه
Ebraheem Ghazy: قولى ازاى
othman MOHAMMED: ما انا قلت لك مش حنتفق
Ebraheem Ghazy: طيب ماتقول
Ebraheem Ghazy: انا لم اغير الحقائق
Ebraheem Ghazy: انا اقولك الحق
Ebraheem Ghazy: الآن الاخوان يعملون فى زضح النهار
Ebraheem Ghazy: انت رحت فين ؟
othman MOHAMMED: بأسمعك
Ebraheem Ghazy: اه يعملون فى وضح النهار
Ebraheem Ghazy: فى المساجد
Ebraheem Ghazy: والجمعيات الاهلية
Ebraheem Ghazy: والجامعة
Ebraheem Ghazy: وهيئة التدريس
Ebraheem Ghazy: والعمال
othman MOHAMMED: ومنذ متى كانت المساجد للدعايات السياسيه الرخيصه
Ebraheem Ghazy: والمرأة ايضا لها دور
Ebraheem Ghazy: المساجد لله
othman MOHAMMED: اليست المساجد لذكر الله فقط
Ebraheem Ghazy: والدعوة لله وليست سياسة رخيصة
Ebraheem Ghazy: " قل ان حياتى ونسكى ومماتى لله رب العالمين"
othman MOHAMMED: هل انت متأكد ان الإخوان يقومون بالدعوه الخالصه لوجه الله
Ebraheem Ghazy: وايه اللى يخلى حضرتك تشك
Ebraheem Ghazy: اين الدليل
othman MOHAMMED: إذا كانوا كذلك فلتقتصر دعوتهم على إصلاح المجتمع بالحسنى 
Ebraheem Ghazy: وده اللى بيتم
Ebraheem Ghazy: مفيش غيره
othman MOHAMMED: انت بقى لك قد ايه معاهم
Ebraheem Ghazy: وفى المقابل يعتقلو ويتأذو وهم صابرون
Ebraheem Ghazy: اكثر من 30 سنة
Ebraheem Ghazy: واتسجنت 5 مرات
Ebraheem Ghazy: والحمد لله صابر ومحتسب
othman MOHAMMED: فى اى كادر حضرتك حاكم شغلهم درجات واسرارهم درجات ايضا
Ebraheem Ghazy: مش فاهم
othman MOHAMMED: يعنى فى الهيئه العليا واللى بعدها واللى بعدها وهكذا .وكل درجه لها اسرارها
Ebraheem Ghazy: سبحان الله
Ebraheem Ghazy: وايه المشكلة
othman MOHAMMED: انت زعلت من اول محك ليه
Ebraheem Ghazy: الاخوان فى حرب مغ اغدائها
othman MOHAMMED: مين هم اعداءها
Ebraheem Ghazy: ولازم يكون لها اسرار
Ebraheem Ghazy: الدولة مثلا
othman MOHAMMED: والدوله اعداءهم ليه
Ebraheem Ghazy: شىء طبيعى انها تعاديهم
othman MOHAMMED: ليه
Ebraheem Ghazy: وهم كفار قريش عادو النبى ليه
othman MOHAMMED: هل الدوله كفار
Ebraheem Ghazy: عشان خايفين على مصالحهم
othman MOHAMMED: وانتم النبى محمد عليه الصلاة والسلام
Ebraheem Ghazy: لا انا باديك مثل
Ebraheem Ghazy: وانت باحث
othman MOHAMMED: مثل فى غير محله
Ebraheem Ghazy: لا تأخذ الكلام من اطرافه
Ebraheem Ghazy: انت مجيتش مصر من اد ايه
othman MOHAMMED: هل تؤمن بحقوق المرأه
Ebraheem Ghazy: نعم
othman MOHAMMED: لغايه فين
Ebraheem Ghazy: لغاية ما اتعلم منها العلم
Ebraheem Ghazy: انا اللى علمنى مدرستى
othman MOHAMMED: مانت بتتعلم منها على طول
Ebraheem Ghazy: سيدة مدرستى
othman MOHAMMED: هل يجوز ان يكون المرشد العام امرأه
Ebraheem Ghazy: لا
othman MOHAMMED: ليه
Ebraheem Ghazy: لانها مهمة شاقة وفيها مخاطر
Ebraheem Ghazy: ولكن ممكن اذا عدمنا الرجال
othman MOHAMMED: ومين قاللك انها غير قادره على تحمل المخاطر
othman MOHAMMED: طيب السيده عائشه كانت قائده حرب الجمل فما رايك
Ebraheem Ghazy: طالما ان هناك رجل يتحمل المسئولية
Ebraheem Ghazy: ليه ندخل المرأة
othman MOHAMMED: وشجرة الدر اعظم حاكمه فى العصر المملوكى لمصر وافضل من سلاطين كثير
Ebraheem Ghazy: معركة الجمل لم تقودها السيدة عائشة
Ebraheem Ghazy: بل كانت خارجة لاصلاح ذات البين
othman MOHAMMED: امال كانت بقيادة مين
othman MOHAMMED: إحنا حنذور فى التاريخ كمان
Ebraheem Ghazy: وشجرة الدر كانت منظر وكان ايبك فو الحاكم الفعلى
Ebraheem Ghazy: انت اللى مش واخد بالك
othman MOHAMMED: قبل و بعد ايبك يا صديقى
Ebraheem Ghazy: او بتدخل فى مزانق ملهاش لازمة
Ebraheem Ghazy: المهم انت بقالق اد ايه برة مصر
othman MOHAMMED: ثم إنه إذا كانت هناك إمرأه على درجه كافيه من الكفاءه لماذا لا تحكم
othman MOHAMMED: الكفاءه
othman MOHAMMED: بقى لى سنتين فقط
Ebraheem Ghazy: ياسيدى تحكم مفيش مشكلة
Ebraheem Ghazy: انت مزعل نفسك ليه
othman MOHAMMED: طيب ولو وصلتم للحكم  حتعملوا إيه فى ألاقباط بس بأمانه ومن غير زواق فى الكلام
Ebraheem Ghazy: ما احنا بتحكمنا مرات الريس
othman MOHAMMED: هل ممكن يكون منهم رئيس وزراء او رئيس برلمان
Ebraheem Ghazy: حنقطعهم حتت ونقليهم فى الزيت المغلى
Ebraheem Ghazy: اقباط ايه ياعم
Ebraheem Ghazy: مش حنعمل فيهم زى ماعملت فرنسا المستنيرة فى المسلمين
othman MOHAMMED: انا بأسألك انت مش بأسأل واحد فرنساوى
othman MOHAMMED: ماذا ستفعلون بهم ؟؟
Ebraheem Ghazy: الاقباط معنا فى نقابة المهندسين
Ebraheem Ghazy: اخوة لنا
othman MOHAMMED: وهل سيدفعون الجزيه مرة اخرى كما طالب بذلك مصطفى مشهور أم لا
Ebraheem Ghazy: اسأل مهندسون ضد الحراسة فيها اخوان واقباط
Ebraheem Ghazy: لا مش حندفعهم حاجة
Ebraheem Ghazy: طالما بيشاركو معنا
othman MOHAMMED: ما هو ده الكلام المزوق  اللى على السطح انا بأتكلم معاك عايز اعرف اللى فى القاع
othman MOHAMMED: بيشاركوا فى ايه بألضبط
Ebraheem Ghazy: ولكن لا يخونو الدولة المسلمة
Ebraheem Ghazy: اسأل الاقباط اللى استنجدوا بشارون
othman MOHAMMED: يعنى الجزيه تسقط عن المخلصين ويدفعها المجرمين
Ebraheem Ghazy: طبعا والقتل كمان للمجرمين
Ebraheem Ghazy: الذين يخونون الدولة المسلمة
Ebraheem Ghazy: ولا هى الدولة المسلمة دولة ناس هبل
Ebraheem Ghazy: مدروشين
Ebraheem Ghazy: اصحى ياباحث
othman MOHAMMED: يعنى بصوره اوضح هل مفهوم الجزيه  لازال موجود لديكم بخصوص الآقباط ولا لأ
Ebraheem Ghazy: انت عايز تكتب المقال عنى
Ebraheem Ghazy: الجزية فى الاسلام اقرأها فى فقه الشافعى او غيره
othman MOHAMMED: انا بأسألك فى اللى انت طلبت منى ان اتحاور معك فيه  فخليك  جرىء وكمل للأخر
Ebraheem Ghazy: وهو ده كان موضوع الحوار
Ebraheem Ghazy: الموضوع انك مستنير
othman MOHAMMED: الحوار عن الإخوان  يا صديقى العزيز
Ebraheem Ghazy: وانا شايف إنه من تمام الاستنارة انك تكون من الاخوان
othman MOHAMMED: انا اعوذ بالله ياراجل
Ebraheem Ghazy: ولو فيه اى مشكلة تصلحها من الداخل
othman MOHAMMED: إذا كنتم مزنوقين فى أمير ولا حاجه ممكن اوافق  ههههههههههه
Ebraheem Ghazy: ليه متكونش انت المرشد بدل المرأة اللى قلت عليها
Ebraheem Ghazy: وتعمل اللى انت عايزه
othman MOHAMMED: انا مأنفعش ابقى مرشد ولا أمير .لآنى أؤمن بالحريه وليس بالإستبداد الإخوانى
Ebraheem Ghazy: ياسيدى تعالى ادينا حبة حرية من بناعنك
othman MOHAMMED: شوفت انت قلت وتعمل إللى انت عايزه يعنى مفيش فرق بين ألامير والحاكم المستبد يفعل ما يحلو له
Ebraheem Ghazy: ده انت
Ebraheem Ghazy: اما المرشد اليوم له مجلس شورى
Ebraheem Ghazy: ومبيعملش حاجة الا بالشورى
Ebraheem Ghazy: وانا لما بقولك اعمل اللى انت عايزة باديك حرية التصرف فقط
Ebraheem Ghazy: قول رأيك فى مجموعة
othman MOHAMMED: المهم نرجع للمواضيع الاساسيه .ومنها وماذا ستفعلون مع المختلفين معكم فكريا وعقائديا مثل الشيعه المصريين والبهائيين والقرآنيين والصوفيين وهكذا
Ebraheem Ghazy: والآخر الرأى شورة
Ebraheem Ghazy: هو كله فى اعدة واحدة
Ebraheem Ghazy: المهم انا اتشرفت بيك
Ebraheem Ghazy: بجد
Ebraheem Ghazy: بجد
othman MOHAMMED: علشان نحدد بعد كده حلقات النقاش  ونخصص كل مره موضوع متكامل
Ebraheem Ghazy: انا تحت امرك
Ebraheem Ghazy: قولى مواعيدك ايه
othman MOHAMMED: وانا كمان .وعموما الف سلامه  وسعدت بلقائك .ومأعرفش برضه انت عرفت ألأميل بتاعى منين
Ebraheem Ghazy: زالله مش عارف
Ebraheem Ghazy: المهم انه مسجل عندى على الياهو ماسنجر
Ebraheem Ghazy: عموما حصل خير
Ebraheem Ghazy: اسيبك لمقالك
othman MOHAMMED: عموما فى النهايه تقبل دعوتى للمشاركه معنا فى الحوار على موقع أهل القرآن
Ebraheem Ghazy: هو موضوعه ايه
othman MOHAMMED: www.ahl-alquran.com
Ebraheem Ghazy: مهم اهل القرآن دول بعد شوية حيبقو جماعة
Ebraheem Ghazy: ولازم لهم امير
Ebraheem Ghazy: خلى بالك
Ebraheem Ghazy: خلى بالك
othman MOHAMMED: ما هو انا ألامير هههههههههههه
Ebraheem Ghazy: طيب اعدل ياامير
Ebraheem Ghazy: عامل جماعة على قدك وجاى تناقشبى فى الاخوان
Ebraheem Ghazy: ربنا معاك
othman MOHAMMED: انا [اضحك معاك احنا معندناش النظام ده احنا مجموعه من الباحثين عن الحق من خلال القرآن الكريم وحده
othman MOHAMMED: عموما سلام ونلتقى قريبا
Ebraheem Ghazy: طيب ربنا معاكم
Ebraheem Ghazy: ويوفق الجميع
 
 
أيه رأيكم فى الكلام ده   بارك الله فى أعماركم.
اجمالي القراءات 9248

للمزيد يمكنك قراءة : اساسيات اهل القران
التعليقات (9)
1   تعليق بواسطة   البدري البدري     في   الأحد 04 فبراير 2007
[2115]

الأخ عثمان محمد والراي المعاكس

السلام عليكم ورحمة الله وبركاته
أخي لقد قرات المحادثة وبحق كانت شيقة وممتعة وأثمن بك أنفتاحك على الراي الأخر وفي نفس الوقت أطالبك بالمزيد لأن المنتدى يكاد يكون فقط للقرأنيين ولا وجد للرأي المغاير إلا في شخص واحد كان الله في عونه وأتمنى على حضرتك أنه إذا حظر هذا الشخص الى المنتدى أن تعلمني عن طريق البريد الألكتروني المسجل عندكم أو تطلبه مني وسأرسله لك على بريدك الألكتروني وكلي شكر وامتنان لك .

2   تعليق بواسطة   مهيب الأرنؤوطي     في   الأحد 04 فبراير 2007
[2127]

مقالة رائعة مع بعض التحفظات

أخي الفاضل عثمان محمد علي:
حقاً إنه حوار رائع ولكن لي تحفظات عليه:
أولاً: إنني علي يقين بأن السيدة عائشة رضي الله عنها لم تخض تلك المعركة (موقعة الجمل)، ولم تشترك في تقتيل المؤمنين الذين وصل عددهم إلي آلاف الضحايا!!، والدليل الذي أستند عليه هو من القرآن الكريم، يقول الله تبارك وتعالي: (النبي أولي بالمؤمنين من أنفسهم وأزواجه أمهاتهم)، فهل يعقل أن الأم تدفع أولادها إلي خوض معارك بينهم بدلا من أن تجمع شملهم وتدفعهم إلي التصالح مع بعضهم بعضا؟؟ ولمن تكون تلك الأم يا تري؟؟...إنها أم للمؤمنين جميعاً، إنها من أفضل الأمهات في التاريخ إن لم تكن أفضلهم علي الإطلاق!!! ..ولكنها آفة التاريخ الذي يصفه علماؤه بأنه مطية الكذب فلا ينبغي أن نستند إليه ويكفينا القرآن الكريم فقط فإنه أصدق مرجعية تاريخية علي وجه الأرض.
ثانياً: لماذا لا تؤمن بالدولة الدينية؟؟...... وإن لم تكن هناك دولة دينية، إذن فكيف يتسني لنا تطبيق الشريعة الإسلامية من قطع يد السارق أو جلد الزاني أو القصاص الذي يتمثل في الإعدام بالسيف للقاتل؟؟... أرجو منك يا أخي العزيز إجابة علي تساؤلاتي هذه فلربما أكون مخطئاً في النقطة الثانية، ولكن أعتقد أنني بالطبع مصيب في النقطة الأولي بلا أدني شك......
جزاك الله تعالي كل الخير

3   تعليق بواسطة   محمد رفعت     في   الإثنين 05 فبراير 2007
[2153]

الشكل والمضمون ..

الأخ الحبيب : د.عثمان
فكره زكيه رغم أنها جاءت بعفويه وهى فكرة كتابة هذا الحوار ورغم عفويته وربما بساطته أجده وبزكاء الاسئله التى طرحتها عليه يادكتور ، أجده يعرض ببساطه شكل ومضمون الفكر الاخوانى ..
فهو كما يبدو لكل من قرأ المقال .. يبدو المهندس غازى هادئ يحب الحوار وأتصور ان كلمة حوار تعنى الاختلاف فى وجهات النظر أكثر من مجرد التحاور والاستماع للرأى الآخر ، فمادمنا نقول حوار اذا هذا يعنى أننا نتقبل الآخر ونحترمه ونحترم وجهة نظره ..
هذا ماقد يبدو من ردود الباشمهندس غازى .
لكن هل الواقع العملى أو بتعبير آخر مضمون الإخوان كفكر يقبل الآخر ويحترمه ويعترف بأحقيته فى السلطه ، ويعتقد بنسبية الحقيقه ، ولايوجد من يستأثر بها..؟!
حقيقة لاأعتقد ذلك ...
والتجارب معهم تثبت أن دعاويهم وما يظهرون به ( أى شكلهم ) عباره عن واجهة للأهداف الكبرى التى يسعون لتحقيقها ..
وصحيحة فكرة الكدر التى أشرت لها يا دكتور فربما أقل الكوادر التى تراها منهم أناس عاديون جدا يرحبون باختلافك معهم ويبدون حبهم الخالص لك لوجه الله ويتقربون منك وربما يحوذون على حبك وتقديرك ..
لكن ..
الكوادر الأعلى بالطبع غير ذلك فهى ترعى السياسات وتوجه الكوادر الدنيا وتخطط لتنتشر وتنتشر وتنشر الفكر الأخوانى بكل مافيه..
أسأل الله الهدايه لنا جميعا ..
شكرا على المقال الجميل أخى الفاضل العزيز ..
وخلى بالك من باب الماسنجر بتاعك
خالص تحياتى

4   تعليق بواسطة   محمد رفعت     في   الإثنين 05 فبراير 2007
[2154]

الشكل والمضمون ..

الأخ الحبيب : د.عثمان
فكره زكيه رغم أنها جاءت بعفويه وهى فكرة كتابة هذا الحوار ورغم عفويته وربما بساطته أجده وبزكاء الاسئله التى طرحتها عليه يادكتور ، أجده يعرض ببساطه شكل ومضمون الفكر الاخوانى ..
فهو كما يبدو لكل من قرأ المقال .. يبدو المهندس غازى هادئ يحب الحوار وأتصور ان كلمة حوار تعنى الاختلاف فى وجهات النظر أكثر من مجرد التحاور والاستماع للرأى الآخر ، فمادمنا نقول حوار اذا هذا يعنى أننا نتقبل الآخر ونحترمه ونحترم وجهة نظره ..
هذا ماقد يبدو من ردود الباشمهندس غازى .
لكن هل الواقع العملى أو بتعبير آخر مضمون الإخوان كفكر يقبل الآخر ويحترمه ويعترف بأحقيته فى السلطه ، ويعتقد بنسبية الحقيقه ، ولايوجد من يستأثر بها..؟!
حقيقة لاأعتقد ذلك ...
والتجارب معهم تثبت أن دعاويهم وما يظهرون به ( أى شكلهم ) عباره عن واجهة للأهداف الكبرى التى يسعون لتحقيقها ..
وصحيحة فكرة الكدر التى أشرت لها يا دكتور فربما أقل الكوادر التى تراها منهم أناس عاديون جدا يرحبون باختلافك معهم ويبدون حبهم الخالص لك لوجه الله ويتقربون منك وربما يحوذون على حبك وتقديرك ..
لكن ..
الكوادر الأعلى بالطبع غير ذلك فهى ترعى السياسات وتوجه الكوادر الدنيا وتخطط لتنتشر وتنتشر وتنشر الفكر الأخوانى بكل مافيه..
أسأل الله الهدايه لنا جميعا ..
شكرا على المقال الجميل أخى الفاضل العزيز ..
وخلى بالك من باب الماسنجر بتاعك
خالص تحياتى

5   تعليق بواسطة   AMAL ( HOPE )     في   الإثنين 05 فبراير 2007
[2167]

حنقطعهم حتت ونقليهم فى الزيت المغلى

قصيدة مهداة من الباش مهندس ابراهيم غازي الى الامير عثمان محمد علي المحترم


طيب اعدل ياامير
ايه اللى جابك عندى
ايه جاب ايميلك عندى
قولى ازاى
عموما حصل خير
بجد
بجد
خلى بالك
انا تحت امرك
قولى مواعيدك ايه
وتعمل اللى انت عايزه
انت مزعل نفسك ليه
انت اللى مش واخد بالك
ولو فيه اى مشكلة تصلحها من الداخل
تأخذ الكلام من اطرافه
والآخر الرأى شورة
ربنا معاك
( اليست جميلة , القصيدة المهداة اليك يا اخ عثمان محمد علي والتي رأيتها بين سطور الحوار اعلاه )
طاب يومك
امل

6   تعليق بواسطة   عثمان محمد علي     في   الأربعاء 07 فبراير 2007
[2188]

شكر ا إخوتى .وأختى الآستاذه -امال :

إخوتى الآعزاء اشكركم جزيلا على مروركم وتعقيباتكم الجميله على المقاله التى خرجت دون تدخل او تخطيط منى مسبق لها وتسببت فى تـاخير مقالة اخرى ستنشر قريبا إن شاء الله تعالى .وشكرا لكل من قرأ المقاله .وأعود لبعض طلبات الأخوه المعقبين .الآستاذ البدرى .اخبر حضرتك انه عندما يكتب أحدا سواء مقاله او تعقيب فالكل يرى ما كتبه ولا تدخل هنا من قبل الإداره على النشر فعندما يحضر ألمهندس - إبراهيم غازى او غيره من ألاخوه ستعلم بوجوده ربما قبل منى وتستطيع مراسلته مباشرة دون الحاجه إلى تدخل من أحد ..اما عن وجودك فقط فى الموقع من الرآى ألاخر فأعتقد انك فيك البركه وكفايه ماأنت مطلع عنيننا وبتقلب الحقائق زى ما انت عايز وإحنا حنقدر عليك وعلى اللى حيجى كمان (الله يسامحك ) وعلى كل حال طبعا أهلا وسهلا بأى فكر سواء إتفق او إختلف معنا مع الإلتزام بأدب الحوار..... اخى العزيز مهيب ..تعقيباتك كلهاثمينه وممتازه .وبخصوص طلبك بالرد على ما أثرته من نقطتين هامتين فأعدك ان أتحاور معك فيهما فى مقالاتين خاصيتين بهمافى وقت لاحق إن شاء الله .لضيق الوقت فى هذا الإسبوع عندى...
حبيبى المهندس الكبير -محمد رفعت _ اشكرك على تعقيبك والذى اشرت فيه عن بعض خفايا الإخوان . واعتقد اننا مطالبون بمقاومة فكرهم وفكر الدوله الدينيه بشكل عام محاولة منا فى إنقاذ الأجيال القادمه من براثن إولئك ألأشرار..
ألاستاذه الفاضله --امال __ اشكرك شكرا خاصا على تجميعك قصيدة الشعر الحر ..وانا قبلتها هدية من حضرتك وليست من المهندس -غازى ..ولك خالص التحيه والإحترام..طاب يومك بالف خير وسعاده وابعد الله عنك وعن اسرتك وإخوانك فى الدين والإنسانيه كل سوء وكل زيت مغلى ....

7   تعليق بواسطة   AMAL ( HOPE )     في   الأربعاء 07 فبراير 2007
[2190]

الاخ عثمان محمد علي المحترم , شكرا

طاب يومك
وشكرا لتمنياتك لي , اعرف هي ليست قصيدة مضبوطة ولكن لا تعرف كم تعبت بها الى ان جمعتهالك بهذا الشكل.
طاب يومك بفرح وسروروخير .
( القطار سوف يفوتني , يجب ان استعجل).
في امان الله

8   تعليق بواسطة   البدري البدري     في   الخميس 08 فبراير 2007
[2234]

الأستاذ عثمان محمد علي

أخي الحبيب ما عاش من يطلع عينك نفسي لنفسك فداء ولكن كل هذا من باب الشئ بالشئ يذكر واصبر علي اخيك كما صبرت على تعليقك المعنون ( الوووووووووو يا امم ) ودمت بخير .

9   تعليق بواسطة   سفير حمادى     في   الثلاثاء 13 فبراير 2007
[2368]

ربنا يعينا جميعا

فى الحقيقة يا استاذى الفاضل الشوارع تعج بمثل الاخ الذى حاورك ومثل تلك الكلمات التى يتم تكرارها من أفواههم بأسلوب محاكاة الببغاوات والتى لها صدى فى كل المنتديات العربية أيضاً والمعترض على حديث الببغاء هو اليوم فى موقع ( ربنا يهديك) وغدا فى دولتهم التى لن تكون بمشيئة الله فى طابور المغضوب عليهم والضالين
يكفينا انهم دون فكر ودون حُجج لا متينة ولا ضعيفة
وحلمهم بعيد ولن يكون

أضف تعليق
لا بد من تسجيل الدخول اولا قبل التعليق