رسالة إلى الأمير محمد بن سلمان

إقتراح هندسي وقرآني لتيسيرالطواف وحفظ أرواح الحجاج والمعتمرين.

عادا الحاج والحجة من أداء فريضة العُمرة ،وإحتفلنا بهم في وجود الأهل والأصدقاء والجيران ، وبعد توزيع الهدايا (مصاحف – وسجاجيد صلاة وجلاليب بيضاء للرجال وعبايات للبنات ) .

وذهب الأهل والأصدقاء ، ولم يتبقى سوى أفراد العائلة
الحاج والحاجة وأخى أبو بكر وزوجته كوثر وأنا .
قلت للحاج والحاجة . حمدا لله على سلامتكم ،وعمرة مقبولة إن شاء الله .

كنت قلقان عليكم وأنتوا لوحدكم ،لكن الحمد لله رجعتم بالسلامة وكويسين.
فقالت كوثر ::
إيه عمى  /إيه يا ماما إنتوا جايين تعبانين وخاسين  كده ليه ،وباين عليكم الإرهاق ، أنتوا مأكلتوش هناك ولا إيه ؟؟  بكرة أعمل لكم حلة محشى ، ودكرين بط ، وفطير وعسل ابيض يرموا عضمكم .

الحاج والحاجة ::
ربنا يكرمك يا بنتى ويطلعوا أولادكم طيبين وحنينين عليكم كده لما تكبروا .

أبو بكر ::

إيه يا والدى إيه يا والدتى أحكوا لنا عملتوا إيه في العُمرة ؟؟
 الحاج ::
أول ما دخلنا الحرم أنا وأمك ما أمسكناش نفسنا من العياط ،مش مصدقين اننا في بيت الله الحرام ، وأنا أسكت فيها وهى تسكت فيا لغاية لما بدأنا في الطواف .
ولما بدأنا في الطواف ودخلنا في الصف وفى وسط الناس ، الصفوف كانت زحمة قوى علشان عمرة مولد النبى بتبقى فيها ناس كتير .

والناس بتزق في بعض وعايزين يوصلوا للكعبة ، ويبوسوا فيها ويلمسوها ويبوسوا في الحجر الأسود .

وكل ده خلى الناس ماشيين زى موج البحر مش قادرين يتحكموا في نفسهم ،وكلهم لازقين في بعض ستات ورجالة (غصب عنه) .
واللى يقع بيدوسوا عليه، وممكن يموت واللى يوطى ينقذه ممكن يموت هو كمان من الزحمة .والناس معنهاش صبر ولا رحمة ، ولا بيعملوا حساب أن في ناس كبيرة في السن ،وناس عندها تعب في رجلها زى وزى الحاجة كده ،ويدوبك بيمشوا بالعافية .

كوثر :
بطريقة عفوية :: يا حبيبتى يا ماما ، وعملتى إيه ، ده أنتى عندك خشونة في الرُكبتين ؟؟
الحاج والحاجة ::
والله يابنتى بقى ويلى ويلين ،هو أنا جاى أعمل عُمرة وأطوف حول الكعبة ، ولا جاى احجز الناس والزحمة عن الحاجة أحسن تروح منى ؟
المهم :: ربنا بيقوى وعملنا الطواف  لكن تعبنا فيه ٌقوى يا ولاد .
أبو بكر ::
يا أبي المشقة فيها أجر، ولا يجوز أن نشتكي من الزحمة في بيت الله.
 المهنس عصام :
تعرف يا حاج :: الموضوع ده له حل سهل وبسيط وسريع ،وممكن تنفيذه في أقل من إسبوع ،وحنقضى به على مشاكل الزحمة ، ونقلل من عدد الناس اللى بتموت منها في الحج والعُمرة .
 أبو بكر ::
حل إيه يا عصام ، نلغى الطواف بقى ولا نعمل إيه ؟
الحاج والحاجة ::
قول لنا يا أبنى  ربنا يفتح عليك .
المهندس عصام ::
بأقترح يعملوا سور حديد بإرتفاع 5 متر بين كل حديدة والتانية 10سم بحيث لا يحجب الرؤية ، وعلى بُعد مترين من الكعبة يمنع وصول الحجيج والمعتمرين لها.

وبجواره ممرات مسورة بأسوار حديد بإرتفاع متر ونص ، مختلفة فى ألوانها ،باللون الأبيض للرجال .
 وممرات بلون أخضر للنساء .

وبكده يكون في حرية وراحة للرجال وللنساء بمنع الإختلاط والإلتحام من الزحمة اللى بتحصل دلوفتى .

وتكون  بعدهم ممرات دائرية متحركة حول الكعبة، كل ممر بعرض أتوبيس مثلا ،زى الممرات الموجودة فى المطارات ، وتكون مُجهزة بكراسى يجلس عليها كبر السن والمرضى والمُعاقين ،ويطوفوا وهم جالسون على الكراسى ،لنحميهم من الزحام ومن الإرهاق والتعب أثناء الطواف .

ويكون معهم .مُساعدين من موظفين خدمة الحرم يساعدوهم فى ركوب هذه الممرات والجلوس والنزول منها.

وكمان تقسيم طريق السعى بين الصفا والمروة إلى ممرات للرجال ،وللنساء ،وممر متحرك لكبار السن والمرضى من الناحيتين.

ودى مجرد فكرة ،ولكن عند التطبيق فالمهندسين المتخصصين والفنيين القائمين على خدمة الحرم حيعيدوا تخطيطها ورسمها بشكل دقيق قابل للتنفيذ .

أبو بكر ً::
متعجبا مُكفهر الوجه :

ممرات متحركة وأسوار إيه ؟ دى بدعة ،نغير العبادة بقى علشان خاطركم ؟

الحاج والحاجة :

يا بكر إسمع ما تبقاش حنبلى .
كوثر ::
والله فكرة حلوة وتخلى الناس تفكر في الدعاء والتسبيح وهم بيطوفوا ،مش يفكروا حيحافظوا على ستاتهم وأنفسهم إزاى من الزحمة، ومن خطر لو وقعوا وهم ماشيين ، هم في إيه ولا في إيه ؟
المهندس عصام :
يا بكر ،او يا أبو بكر علشان متزعلش  ههههههههههه .
القرءان يا حبيبى بيقول (فإتقوا الله ما إستطعتم )
وبيقول( وما جعل عليكم في الدين من حرج )

طيب إحنا ليه منخليش الإستطاعة سهلة وفى أيدينا ، وميُسرة عن طريق ستخدام العلم والتكنولوجيا لتكون في خدمة الحجاج ؟؟
إحنا عملنا الممرات والسلالم المتحركة في المولات والمبانى الحكومية والمطارات ، وسهلنا الحركة على الناس ، حنيجى على الحجاج في الطواف والسعى ونحرمها ؟؟
أنت مش شايف أن حفظ حياة الناس من الموت بسبب الزحام ، وكمان حفظ كرامة وخصوصية النساء بإبعادهم عن الزحام وإلتصاق الرجال غصب عنهم بهم في الطواف والسعى أصبح ضرورة تقتضيها ضرورات التشريع ،لأنها أصبحت تحت قوله تعالى ( فأتقوا الله ما إستطعتم ) .
وقوله تعالى ( وما جعل عليكم في الدين من حرج ) ؟؟
وأنت مش واخد بالك أن الناس دلوقتى ما عدوش بيروحوا الحج مشيا على الأقدام ، ولا على الجمال زى زمان ، ولكن بيروحوا بالعربية أو الأتوبيس وكمان بالطيارة ،
طيب ليه عايز تحرّم أننا نعمل لهم ممرات خاصة بالرجال والنساء ، وممرات متحركة لكبار السن والمرضى في الطواف والسعى ؟؟
هو إحنا حنقبل التطور والتكنولوجيا في السفر ونرفضه في الطواف والسعى ؟؟
 طيب على كده نروح نقلع بلاط صحن الكعبة لأنه معمول بتكنولوجيا إمتصاص درجات الحرارة العالية ، ونخليهم ما يقدروش يمشوا ويطوفوا وأرجلهم تتحرق من درجة حرارة تقترب من ال 80 في الصيف ، ولا إيه ؟؟

الأم ::
والله يا بني لو ده حصل لأروح  أعمل عمرة كل سنة ،أو كل سنتين .سنة أبوك يروح  لوحده ، والسنة التانية أروح أنا لوحدى علشان الفلوس ،والعمرة بقت غالية قوى كمان فمنقدرش عليها إحنا الإثنين كل سنة .
 صحيح يا إبنى  الدين يسر.

الأب::
ياريت يا باشمهندس فكرتك دى توصل للأمير محمد بن سلمان .لو وصلت له أكيد حيفكر فيها ،وربنا يهديه وييسر له الأمور وينفذها . فكرة حتحافظ على حياة وأرواح الناس ، ومتخليش المرضى يحملوا هم زحمة الطواف والسعى .