البابا شنودة في العظة الأسبوعية:«مفيش حاجة اسمها عذاب القبر

الأربعاء ٢٤ - أبريل - ٢٠٢٤ ٠٦:٣٩ مساءً

اضيف الخبر في يوم الثلاثاء ٠٧ - أبريل - ٢٠٠٩ ١٢:٠٠ صباحاً. نقلا عن: البديل

البابا شنودة في العظة الأسبوعية:«مفيش حاجة اسمها عذاب القبر
07/04/2009
لأن الجسد لما يموت بيفقد الإحساس والروح تذهب للرب مباشرة»
فتاة تسأل «تقدم لي شاب يصغرني بعامين.. أعمل إيه؟» والبابا يرد «اعتبريه زي ابنك الكبير»

مقالات متعلقة :
درس تعلمته من البابا شنودة
عذاب القبر بين الحقيقة والخيال
خواطر حول وفاة البابا شنودة
عذاب القبر أم عذاب الفقر
مصدر خُرافة عذاب القبر
خرافة عذاب القبر
مصدر عذاب القبر كان من يهودية وغلام، فهل تصدقون؟؟؟
هل عذاب القبر حقيقة، أم صناعة يهودية بخارية؟؟؟
النبى محمد فى حوار مع ال (سى إن إن )عن العظة من قصة آدم وحواء

الإسكندرية: أحمد صبري
نفي البابا شنودة الثالث بطريرك الكرازة المرقسية وبابا الإسكندرية وجود شيء اسمه عذاب القبر.. وقال رداً علي سؤال لأحد الحضور خلال عظته الأسبوعية التي ألقاها مساء أمس الأول بمقر الكنيسة المرقسية بالإسكندرية حول رأي في عذاب القبر: «مفيش حاجه اسمها عذاب القبر، لأن الروح تذهب للرب مباشرة عندما يموت الإنسان». وتابع: «والجسد لما يموت بيفقد الإحساس فكيف يتعذب وهو أصلاً لا يشعر بأي شيء».
وسألت فتاة البابا عن رأيه في ارتباطها بشاب تقدم لها وهي عمرها 27 سنة، وهو يصغرها بسنتين ونصف.. فرد البابا: «وماله، اعتبريه زي ابنك الكبير». وأضاف: «شوفي يابنتي فيه ناس كتير في نفس حالتك ديه وعايشين سعداء مع بعض».
وقالت فتاة للبابا: «أنا فتاة جامعية وعاطفية جداً» فقال البابا لها: «أهو ده عيبه بقي» ثم أكملت الفتاة سؤالها وقالت إنها تحب معيداً بكليتها ولا تعرف إن كان يشعر بها أم لا وسألت البابا عما تفعله فقال لها: «لو ذهبت إليه وقلتيله إنك بتحبيه حيقولك متشكرين ويفشل الموضوع»، وأضاف: «لكن الأفضل أن ترسلي له صديقة لكي تبلغه بحبك بشكل غير مباشر»، وضحك البابا وقال: «أنا آسف ياجماعة.. أنا مش بعلمكم الشقاوة ولا حاجة».
وضجت القاعة بالضحك عندما قرأ البابا سؤالاً لرجل قال فيه: «ياقداسة البابا وأنا رايح الشُغل بنام في الأتوبيس.. أعمل إيه؟»، فرد عليه البابا قائلاً: الظاهر إنك مش واخد راحتك في البيت، وبعدين ممكن تتكلم مع حد جنبك أو تقول للكمساري والسواق يصحوك عند المحطة اللي هتنزل فيها، وضحك البابا وقال: «صحصح يابني صحصح».
وشكا أب من ابنه الذي لا يسأل عنه، أو والدته بعد زواجه فقال له البابا: «إنتم لو كنتم قدمتوا المحبة ماكانش عمل معاكم كده، بس يظهر إنه بيردلكم عدم الاهتمام بيه»، وأضاف: ويمكن مراته تكون رافضة انشغاله بأهله.
وتجنب البابا شنودة مصافحة الحضور وهي العادة التي اعتاد عليها، وذلك خشية حدوث تزاحم ينتج عنه إصابات كما سبق أن حدث في العظة الأخيرة

اجمالي القراءات 3769

التعليقات (1)

1 تعليق بواسطة عمار نجم في الثلاثاء ٠٧ - أبريل - ٢٠٠٩ ١٢:٠٠ صباحاً

[36689]

إخوانا الأقباط طيبين ودمهم خفيف

لو كان ده شيخ من بتوعنا قاعد علشان يفتي ويجاوب على أسئلتنا كان قال عذاب القبر حاجة مهولة حاجة مذهلة حاجة تخلي الولدان شياب والعذارى حبالى ويمكن يطفي النور ويعمل ليهم هووووووووووووو وتلاقي واحد واكل فول بيسأله يجوز المسلم يفجر نفسه في بيت عزاء للشيعة والشيخ يجاوب بعين بقحة: يجوز ولكن مكروه!! وواحدة تقول أنا حبلت وخلفت من راجل غير جوزي أعمل أيه علشان أكفر عن ذنبي والشيخ يرد والله ما اعرف ولو أعرف حأقول على طول!! وطالب أزهري يقول عندي إمتحان ومش قادر أنجح لأن الدكتور عاوز فلوس يجوز أدفع رشوة للضرورة؟ والشيخ البهلول يرد لا يا إبني ما تدفعش فلوس الفلوس تديهالي وأنا أعملك بيها حجاب ما حصلش تنجح إنت وكل رفقاتك معاك!! وعيل جعان بياكل ضرب أكثر من الطبيخ يقول مش عاوز أتعلم الشيخ يرد بحنية ليه يا إبني ده الإسلام يحض على العلم (لاحظ كلمة يحض دي قد أيه متناسبة مع لغة الطفل) العيل يرد المدرسة وحشة والمعلمين بيضربونا مش بعلمونا الشيخ يقول الضرب سنة مؤكدة ولازم تستحمل علشان تتعلم العيل يعيط ويقول أستحمل أيه ولا أيه!! ده أنا بقيت زي كونتا كونتي رضي الله عنه (العيل فاكر إن كونتا كونتي هو نفسه بلال ده طبعا من مستوى التعليم الراقي اللي بيحصلوه التلامذة الأيام دي) وواحدة مسطولة مطقطقة تحجبت مبارح على يد عمرو (خالد) حاطة حجاب نص نص إحتراما للشيخ!! تسأل الشيخ عاوزة أتجوز شاب فقير بس باباية مش موافق يجوز أروح الكوافير وأشرب ملوخية قبل النوم؟ الشيخ يرد وأيه دخل الجواز بالكوافير بالملوخية هي ترد لا أنا بسأل أسئلة متعددة في نفس الوقت أصلي تبت وتحجبت وعاوزة أتعلم ديني في يوم وليلة!! أيه ده جاتنا القرف في حياتنا اللي بقت هباب في هباب مش عارف بقينا دمنا تقيل أوي ليه فين أيام الفرفشة والضحك وساعة لقلبك وساعة لربك عاوزين ناس زي دول اللي قاعدين مع البابا شنودة رايقين ومبسوطين وبيحلموا وبيحبوا وبيمزحوا عاوزين ناس زي بتوع زمان تصبحوا على خير خلاص رايح مش راجع ليكم تاني باي باي

أضف تعليق

لا بد من تسجيل الدخول اولا قبل التعليق