قام الشاعر الغنائي احمد فؤاد نجم بتأليف قصيدة شعرية جديدة تهدف إلي تحفيز الثوار الموجدين أمام مجلس الشعب الذين قاموا منذ أيام بالإضراب علي الطعام لتحقيق مطالب الثورة التي لم تتحقق أهدافها مطلقا كما انه عمل علي رفع حالتهم المعنوية وتشجعهم على الاستمرار في نضالهم للوصول إلى غايتهم المشروعة والسلمية - بحد قوله.

وكان قد توجه نجم في ساعة متأخرة من ليلة أمس وبرفقته الكاتبة الكبيرة سكينة فؤاد والإعلامي وائل قنديل، والدكتور عبد الجليل مصطفي المنسق العام للجمعية الوطنية للتغيير والمفكر السياسي عمار على حسن، للإعلان عن تضامنهم مع المضربين عن الطعام ، وتقول كلمات القصيدة :

- سيادة المخلوع .. ارجعلنا سيادة المخلوع .. ارجعلنا

مش أنت واحد مننا ؟

وعمرك في يوم ما سرقتنا

ولا خدت مليم مننا

ما تيجي طب ترجعلنا

تقعد بأهلك وسطنا

أهو مرة تأكل أكلنا

وتلبس يا خويا من لبسنا

وتعيش في حارة أو في شارع زينا

قلت إيه ؟ يا حارق دمنا

سيادة المخلوع ... ارجعلنا

وغداك يا سيدي عندي أنا

رز وبطاطس مسرطنة

لحمة ؟؟..مفيش من سنة

فاكهة ؟؟.. تعيش أنت وأنا

والشاي .. بآخر معلقة م السكر اللي كان عندنا

اشرب وفوق وركز بقه .. علشان نكمل حكينا

سيادة الرئيس .. ارجعلنا

مش سبت الحكم .. لأجلنا ؟؟ـ

ما تيجي تسمع حكمنا !!ـ

أفكرك ؟؟ ولا أنت فاكر زينا

قطار أتحرق من كام سنة

وغازنا اللي طار من أرضنا ... لعدونا

وعبارة مللي بيغرقوا ..!! غرقت في عرض البحر وراحوا أهلنا .. و الجاني فلسع مننا

ومركبة بأحلى شباب ... ييجوا من إيطاليا غرقانين .. والقرش يأكل لحمنا

والله كانوا زينا

ويمكن أحسن مننا

لهم بيوت وولاد وعيشة وحلم .. زي حلمنا

اتغربوا واتبهدلوا .. لما الفساد طال كل حاجة في أرضنا

واللي ما ماتش .. قاعد في غربته .. والغريب بيذلنا

أقول كمان ؟؟ ولا كفاية ... واهو أنت عارف عننا

اصبر هتسمع حكمنا

سيادة الرئيس .. ارجعلنا

ولو أنت واحد مننا

فعلا يهمك أمرنا

بينا عالنائب العام .. تفتنله على ولاد الحرام ... مصوا بلدنا و دمنا

وافتن دي فتنة مش حرام .. ده حقنا

دا لو أنت واحد مننا

اصبر هتسمع حكمنا

سيادة الرئيس .. ارجعلنا

اقعد معانا وزينا

هعرفك .....ـ

دي (أم خالد) أمنا

ودول أهل (سالي) أهلنا

و(عمر بن بنونة ) إبننا

فسر واحكي وقللهم .. و قللنا

واستسمح الروح اللي منورة في الجنة عند ربنا

هتقول مكنش قصدنا ؟؟

دول ماتوا غصب عننا ؟؟

كداب وفاجر .. واللي يصدقك زيك .. والكدب ريحته منتنة

تتشل إيد اللي ضرب ،، و اللي أمر ،، وعليكوا لعنة ربنا

اصبر هتسمع حكما

أيوه بقول ارجع لنا

ياللي سرقت حلمنا

وغربتنا ونهبتنا .. وفي كل حتة أهنتنا

إحنا اللي سال دمنا

في الأربعين و إسكندرية والتحرير يشهد لنا

آدي القفص .. أقف هنا

والشعب يحكم .. مش أنا

صدقني .. هي بينة

من فوق سبع سماوات .. قالها ربنا

العين بالعين والسن بالسن ... وهو دا بقه حكمنا ... ومفيش غيره عندنا