أسماء محفوظ تكتب عن: ترشيح 6 إبريل لنوبل للسلام .. أحلام الحرية وتعذيب احمد ماهر

لما سمعت عن خبر ترشيح حركة شباب 6 ابريل لجائزة نوبل للسلام افتكرت من 3 سنين لما كنا قاعدين مجموعة من الإبريليين بعد ما انهينا اجتماع تحضيري لأحد الفاعليات وإحنا بنحلم ونهزر ونقول بكرة بعد الثورة مين فينا هيبقى رئيس ومين فينا هيبقى وزير وكنا بنضحك وبندي لنفسنا الأمل إننا قادرين على تحقيق حلم الثورة في نفس الوقت اللي كانت الناس وعلى رأسهم أهالينا وأصحابنا بيقولوا علينا مجانين عشان بنحلم بإسقاط مبارك

قد إيه كان عندنا ثقة إننا صح وكان عندنا عزيمة إننا نكمل للنهاية .. فاكرة يوم ما اعتقلوا احمد ماهر ( مؤسس والمنسق العام للحركة ) وعذبوه اشد تعذيب وهما بيحاولوا ياخدوا منه باسورد الجروب على فيسبوك وعرضوا عليه امتيازات كتيير لو سمع كلامهم وبقى معاهم وهو رفض واستحمل التعذيب

فاكره ضحكته وهو بيحكي اللي حصله الضحكة اللي بيخبي وراها ألم شديد وحزن وإحساس بالظلم لكن كان بيضحك عشان يقوي نفسه ويقوينا معاه

ولما قررنا إننا نؤسس الحركة في يونيو 2008 كان جوانا حلم وعندنا تصميم على تحقيقه … كنا بننزل أحيانا 50 فرد بنهتف بأعلى صوتنا يسقط يسقط حسني مبارك وحوالينا مئات من بلطجية مبارك وقيادات أمن العادلي

مكناش بنخاف كان كل ما القمع والظلم بيزيد كان كل ما تصميمنا وإرادتنا وقوتنا بتزيد

كان كل ما يعتقلوا مننا واحد من الحركة كنا ننزل 100 نعتصم أمام النائب العام لحد ما يخرج

كنا بننزل بنوزع منشورات في كل مناطق مصر دعوات لفعاليتنا .. كنا بننزل في منصف الليل نرش اسبراي على الكباري وجدران المباني بالدعوة لإسقاط مبارك

كنا بننزل نتضامن مع مطالب النقابات والعمال والربط بين مشاكلهم وبين نظام مبارك

كنا بننزل في حملات توعية في مناطق شعبية بضرورة سقوط مبارك

كنا بننزل في مكان وإحنا عارفين إن في أي لحظة ممكن نتضرب ويعتقلوا مننا كتيير

كنا بنشكل مظاهرات فجائية في المناطق الشعبية لتشجيع الناس للمشاركة في المظاهرات

ونجحنا في فاعليات كتييير برغم اننا كنا بنتضرب وبنعتقل وبنعتذب واحنا مظاهراتنا كلها سلمية تماما لكن نجحنا

فاكره يوم 25 يناير لما شفت كم العدد الهائل من الناس المشاركة ومن كتر الفرحة عيطت وكانت اول مرة اعرف يعني إيه اعيط من الفرحة

اتاكدت ساعتها ان احنا كنا صح وان ارادة حلمنا كانت اقوى بكتيير من نظام مبارك

ودلوقتي مكمليين ضد اي ديكتاتور يفتكر نفسه اقوى من مبارك

مكمليين حلمنا برغم كمية التخوين من امتداد نظام مبارك (المجلس العسكري) ومن بعض الناس

مكملين لحد ما نشوف حلمنا بيكمل في بناء دولة حرة مدنية ديمقراطية يعامل فيها المصري بكامل إنسانيته

برغم اني تركت 6 ابريل لكن مازلت ابريلية بافتخر بالحركة وكل من فيها

تحية لكل اعضاء 6 ابريل