من اشعار الصبا:
الليل

فوزى فراج في الثلاثاء 17 اكتوبر 2006


اللــيل
1- الليل.........
والنسمه الحلوه الهاديه......
وشوارع ساكته وفاضيه.......
والنجوم الليله ديه عامله زفه حوالين القمر.......
اللي فارد دراعاته فوق روس الشجر............
كان طبيعى ...ليله حلوه زى دى...
أحلى شيئ فيها السهر......
الشوارع هس هس....
ولا صوت ولا حس....
إلا صوت واحد وبس......
خطوتى وخطوة صديقى…(*)
همستى وهمسة صديقى....
ضحكتى وضحكة صديقى....
شيئ جميل...
لما أحس إن الشوارع كلها بقوا ملك إيدى.......
والحارات والبيوت........
حتى أشجار النخيل...والنجيل......
كل دول بقوا ملك إيدى.........

2 - مشكله..........
من ضمن ألفين مشكله.......
فارده الجناح ...طايره مابينى وبين صديقى........
كل واحد فينا مره يضمها..........
كل واحد فينا مره يردها.........
كل واحد فينا يعرض حلها.......
فى النهايه...........
كل واحد فينا ينسى.......
أصله مين كان اللى عرض المشكله.........

3 – والكلام يكتر........
ويلمع فى الضلام ضى السجاير.......
الحكايه انه صديقى......
صاحبى يعنى......
صاحبى من أيام ماكنا صغيرين.......
عشنا واتربينا فى نفس المكان.......
الزمان...والمكان....والمشاكل.....
واحده يعنى......
والشباب تقدر تقول.......
المشاكل كلها من صنف واحد عندهم.......
الجواز مثلاً دا أخطر مشكله........
والمشاكل كلها متشكله........
والنتيجه.........
الجواز شيئ صعب جداً......
على شاب فى أول حياته.......
- يعنى ايه....؟
- يعنى عايز كده فى حدود ألفين جنيه......(**)
وده غير إشكال كبير تانى راح احكيلك عليه.......
- زى ايه....؟
- زى ايه.....!! حاجه واضحه... واضحه جداٌ....
حاحه مش محتاجه منى أى شرح.......
بإختصار......
أقصدى أقول يعنى حكاية لختيار........
دى حياه يابنى ماهيش لعبه حتلعب بيها يوم......
دا انت بتفكر...متين مره وأكتر.......
لما تيجى تشتريلك بنطلون.......
شوف بقى إذا كنت رايح تدى عمرك....
تدى واحده اسمك وشرفك.....
شوف بقى ممكن تفكر أد ايه......
- يعنى ايه...؟ قصدك ايه....؟
- ولا حاجه...بقولك ايه...مش تولع.....
- ماانت لسه طافيها اهه من ربع ساعه....
- ياخى ولع... هو فينا حد واخد منها حاجه.......

4 – والكلام يحلو أكتر....
والمناقشه تبقى أظرف...
- أسكت.. أسكت....
يعنى لو مثلاٌ جنابك متزوج...
مش زمانك كنت فى البيت جنبها......
أو زمانك كنت فى زياره أهلها......
كنت تقدر....
ليله حلوه زى دى تخرج وتسهر....
كان زمانها سودت ليلة جلالة حضرتك....
ولا لو كنت حتخرج....
يعنى مش كنت حتبقى جنبها.......
عايزه ديه...هاتللى ديه...حلوه دى زى بتاعة أختها....
وياخيبتك لوتقول معييش فلوس....
كاتخللى فى وسط عيلتك ..يبقى اسمك " بسلامته"...
تبقى اخر مسخره...
او تجنن حضرتك....
او تقولك فين فلوسى...اذا كات متوظفه....
أو كمان كانت تقولك.....وللا اقولك....
فضنا م السيره ديه....
ياخى َرَْوق..داحنا كده ميت فل خالص.......

5 – ووصلنا ميدان كبير..من ميادين البلد....
ساعه واقفه فى نصه ....واقفه لوحدها.....
بصت علينا...شافتنا...قامت صبحت......
حيتنا بتلات دقات بطيئه منغمه....
واحنا برضه حيناها بالنظر......
الوقت ده...فين وفين....
لما تلقى فى الشوارع زينا....
خلق ماشيه تلف كده مين غير هدف.....
إلا مين تفتكر.....
إلا واحد شغلته بالليل وبس.....
قول حرامى...قول غفير....مش مهم....
او جماعه سكرانين...لسه خارجين م البارات.....
او جماعه بياعين...من بتوع الخضروات.......

6 – واحنا اهه دخلنا على شارع جديد.......
قاللى تعرف....شايف البيت اللى جاى هناك دهه....
اللى بابه اسود حديد.....
فاكر البنت اللى كلمتك عليها.....
لا مهش دى....ولا دى.......
ياخى قصدى البنت دكْها......
اللى شافها معايا حامد.....
اللى قالت ان ابوها طبعه جامد.....
بيتها ده....خدت بالك..........
اهى دى جات لى من يومين شقتك...........
يوم ماكان عندك ميعاد ........
ويا ناهد صحبتك..........
ياسلام كان يوم لذيذ.....مانت راخر واد تغيظ......
حد يعمل عملتك...........
يعنى لو كان جوزها طب عليك فى بيته......
كان مصيرك يبقى ايه......يا فِتِك............
7 – خد بقى اخر سيجاره.....
ليله حلوه... ياميت خساره..........
رأيك ايه فى الموقف الايام دى.......
قصدى يعنى هناك على شط القناه......
حاجه حلوه....حاجه تفرح......
دول خدوا كام علقه تلوح.......
ولا ايه.....
ولا أولادنا اللى طاروا فوق جيوشهم.....
كسروا لهم دبابتهم........
دمروا لهم مواقعهم......
دى العساكر كات بتجرى زى فيران الغيطان......
طيارتهم كات بتسقط......
مدافعهم كات بتسكت........
جاحه تفرح...... جاحه تفرح......
يكفى انه عندنا طيران) بيطلع(......(***)
بيشفوه.....
طيارتهم لما بتشوفه تبرطع.......
سيبك انت......
دى العيال الفدائيه....على ودنه......
ومفيش واحد يهودى ينام وضامن....
انه تانى يوم حيصحى.......
والله احسن...... حاجه تفرح.....
ياللى بقى خلينا نخلص......
خلينا نخلص......

8 – انت م الشارع ده تحود......
وانا اروح.......
ولا تيجى تبات معايا......
- لا حاروح.....
- طب نقول حنشوفك امتى.......
تيجى بكره......
- ده بإراده الله ياصاحبى.......
- طب نقول تصبح فى خير......
- ماحنا وش الصبح اهه....
دا ادان الفجر ادن من زمان......
- بالمناسبه........
انا جت فى دماغى فكره.......
رايك ايه لو يعنى بكره........
بعد ما.............................!!...........


فوزى فراج 1969


(*) هذا الصديق المذكور هو المرحوم محمود عقل الذى توفى عام 2002 وكان من عدد محدود جدا من اصدقائى وقريبا لى فى نفس الوقت, وقد جاء ذكره فى قصائد اخرى.

(**) قد يكون مبلغ 2000 جنيه الآن لا قيمه كبيره له, ولكن فى سنة 1969 كان يعتبر مبلغا ضخما, فعلى سبيل المثال كان خريج الجامعه يتقاضى 20 جنيه شهريا, ولكى يتوافر له مثل هذا المبلغ فكان عليه ان يوفر مرتبه بالكامل لمده 8 سنوات متواصله وان يتكفل بنفقاته شخص اخر طوال هذه المده.

(***) بعد هزيمه 1967 والتى اطلق عليها (نكسه) دمر سلاح الطيران المصرى بأكمله على الأرض , وكانت مصر بأكملها تحت رحمه الطيران الاسرائيلى لأشهر طويله, حتى استطاعت مصر ان تبدأ عملية اعادة بناء القوات الجويه, وفيما كان يطلق عليه "حرب الاستنزاف" استطاعت مصر ان تبدأعمليات جويه بالطائرات الجديده كما بدأت القوات الخاصه فى تنغيص معيشه القوات المحتله فى سيناء, وقد كان لهذا تأثيرا ايجابيا على معنويات الشعب , ولذا كان استعمال ( يكفى انه عندنا طيران بيطلع).


اجمالي القراءات 8926

للمزيد يمكنك قراءة : اساسيات اهل القران
أضف تعليق
لا بد من تسجيل الدخول اولا قبل التعليق
تاريخ الانضمام : 2006-08-18
مقالات منشورة : 149
اجمالي القراءات : 2,912,738
تعليقات له : 1,713
تعليقات عليه : 3,274
بلد الميلاد : Egypt
بلد الاقامة : United State