تبرعوا لفك رهن درع النبى وإسترداده .

عثمان محمد علي في الثلاثاء 20 يناير 2015


تبرعوا لفك رهن درع النبى وإسترداده  .

 

قصة قصيرة

فى يوم من ايام الإسبوع الماضى وانا راجع  الصبح  من توصيل بنتى للمدرسة  عديت على قهوة  تيم هورتنز الشهيرة فى المنطقة. لأشرب كوب  كاكاو بالفانيليا الفرنسية اللذيذة   تساعدنى على تحمل  برد شتاء كندا الفظيع  .وكان المقهى مزدحم  بموظفين البنك والمؤسسات الخدمية المحيطة بالمول التجارى ،ولم أجد مكانا إلا على ترابيزة قاعد  عليها إثنين شكلهم يدل على أنهم عرب . أخدت مشروبى  وسمعتهم بيتكلموا عربى فجلست بجوارهم وقلت لهم صباح الخير .فرد واحد منهم صباخ الخير خبيبى ،ورد الثانى (وعليكم السلام يا أخى ) .فقلت فى سرى  اهلا . صباحنا فُل إن شاء الله. ورجعوا لكلامهم مع بعض تانى ، فقال لى بتاع صباح الخير . إنت عربى خبيبى .فضحكت و قلت  له ايوه  مصرى  عربى  يا خواجه .فقال انا كندى  جدودى من اليمن خبيبى  انا موش خواجه . فضحكت وقلت له احنا عندنا اللى بينطق (الحاء – خاء ) بنقول عليه خواجه .فقال .من فضلك خبيبى إخضرنا .انا إسمى صخاموس بن موشيه .. وصاخبى ده شيخ عبدالودود خطيب  مسجد الإستكامه .قلت له إسمها الإستقامه فقال ايوه صخيخ إستكامه .فقلت ما علينا إيه خير مالكم فى إيه يا شيخ عبدالودود  مزعل  الخواجه ليه ؟؟. وقبل ما يرد علىّ  نط الخواجه صخاموس  وقال أنا اقول لك خبيبى . فقلت تفضل يا خواجه ..فقال .

انا خبيبى عايز ارفع قضية على مسلمين  علشان  نبيهم مُخمد إستلف من جدى ابى  الشخم الكبير  اليهودى 30 صاع من شعيرعلشان يأكل هو وعائلته  ومكانش معاه دراهم ، فرهن درعه عنده  ،  ومات قبل ما يردهم ، ولسه درعه مرهون ، واجدادى توارثوا الدرع واخد ورا التانى لما  ورثته انا عن  ابويا  من 3 سنه. وانا خبيبى عايز ارجعه وآخد خقى خبيبى ، هدا ثروة خبيبى ، هدا آثر عظيم غالى عمره 1426 سنة خبيبى .

.فقلت له يخرب بيتك يا خواجه دا انت يهودى صحيح..

 فضحكت وقلت له طيب يا خواجه لما تروح المحكمة لازم يكون معك دليل وإلا تبقى قضية فشنك .

 

 فقال : لا خبيبى  انا معاى إثباتات كتيرة خبيبى .انا اشتريت كُتب خديث ، وفقه ، وسيرة ،وتاريخ .وكلها  مكتوب فيها  أن نبى مُخمد – استلف شعير من جدى ابو الشخم الكبير ،ورهن درعه عنده ،ومات خبيبى قبل ما يرجعه .وانا معاى صور منها مصورها من  كتاب  بخارى ،وشافعى ، وترمذى ،واخمد بن خنبل ، ،وإبن ماجة ، والنسائى ، والبيهكى (البيهقى ) ، وإبن خجر عزكلانى (عسقلانى ) .. فى ابواب المعاملات – والمغازى ،والإشهاد فى التجارة وابواب كتيرة كمان  ..  وكلها عن  عائشة ،و إبن عباس ، و أنس فى روايات  كلها زى بعضها فى كلام  مختلفة فى رجال قالوها  (أن النبى اشْتَرَى مِنْ يَهُودِيٍّ طَعَامًا إِلَى أَجَلٍ وَرَهَنَهُ دِرْعَهُ عِنْدَ أَبِي الشَّحْمِ الْيَهُودِيِّ رَجُلٍ مِنْ بَنِي ظَفَرٍ).

فقلت له بس ده ممكن ما يكفيش يا خواجه ، وممكن يمسحوها من طبعات  الكُتب الجديدة وتخسر القضية .

فقال .ما أنا خريص يا خبيبى . انا روختو كل بلاد مسلمين ، انا روختو ماليزيا ، اندونيسيا ، جزاير ، مغرب ،اردن ،نيجريا ~،تركيا ، وسألت مشايخ هناك ،وصورت وسجلت كلامى معاهم  وانا بأسألهم هل  كتب بخارى وشافعى  وخنبل سليمة صخيخة ولا لأه ،قالوا لى ايوه  صخيخة  والنبى مُخمد هو اللى قالها .

فقلت له وليه ما روحتش مصر والسعودية وسألت مشايخ الأزهر ومشايخ السعودية .

قال . خبيبى ، انا روخت  يثرب بلد جدودى فى سعودية .وقابلت شيخ اعور هناك قالوا لى أنه مُفتى سعودية ،وسألته عن بخارى وخنبل صخيخ  ولا موش  صخيخ ؟؟ فقال لى  لولا انك اجنبى كنت  سجنتك لما تموت هنا وضربتك بعصاية 10 الف عصاية  . إنت جاى تقول البخارى كذاب ؟؟؟ فقلت له خبيبى انابأسأل شيخ سؤال برىء .. انا غلطان – شيخ مفتى ممكن تجيب لى كتاب جديد من بخارى دليل على انى ما بقصدش خاجة وخشه ؟ . فإتصل بتليفون بمطبعة مدينة وجابوا لى  عشرة كُتب بخارى وخنبل جديدة  ..

وسافرتو  مصر .وروختو لشيخ أزهر ،لقيته عامل واخد شبطه كبيرة قوى  مع مشايخ ،وبيضربهم على رجليهم بعصاية ،ويقول لهم شايفين يا بقر كل ناس بتشتم فى بخارى ،ويقولوا عليه هدا واخد كداب ،واخد نصاب واخد اونطجى  .وانتوا يا بقر  الدولة والأزهر وسعودية  بتعلف فيكم وبتديكم ملايين جنيهات ومش قادرين تردوا عليهم ، وهدا رئيس كمان بيقول لازم تعلموا عيال كلام صح مش  كلام غلط  تانى . وسمعت واخد شيخ بيقولوا عنه شيخ اخمد عبيط  بيخلف بطلاق ،وبيقول علىّ طلاق تلاته  كل كلام سيدى بخارى صحيح ، وانه من عند ربنا ، وانا بقى لى 50 سنة بانام واصخى وانا باسجد له وبادافع عنه فضيلة إمام،  بتضربنى انا كمان ليه ؟؟؟

- فخفتو خبيبى وجريتو على بره ،وسواق تاكسى قال لى  خلاص خبيبى  انا عارف مكان مفتى جمعاوى تعالى اوديك عنده تسأله  على اللى انت عايزه .فروختو عند جمعاوى وسألته عن بخارى وخنبل ،فقال إسمع خواجه اى خاجه مكتوبة فى بخارى وخنبل ،صخيخة ،وزى فُل ، وكل هدا سجلته وصورته .

فقلت له يخرب بيتك داانت مكمل ملف ومستوفى  ورق القضية تمام ،وحتكسبها من أول جلسه .

فقال لى الخواجه ،وانت خبيبى رأيك إيه ؟؟

فقلت له قبل ما أقول لك  رأى .عايز اسأل الشيخ عبدالودود سؤال .

يا شيخ عبدالودود . من خلال دراستك وقراءاتك للتراث والتاريخ ، مفيش ولا رواية ،ولا خبر ولا أثر تاريخى بيقول أن النبى رجع لليهودى ثمن الشعير وإسترد (درعه تانى ) ؟؟؟

فقال لا مفيش .

. طيب مفيش  فى التاريخ ان حد من الصحابة ابو بكر او عمر او على  ، دفع لليهودى ابو الشخم  فلوسه ورجع الدرع تانى  ؟؟

فقال لا .

فقلت له صحيح هما كانوا فاضيين لإيه ولا إيه ؟؟ هم نسيوا محمد من قبل ما يدفنوه وراحوا يقتلوا بعض علشان من يكون الخليفة  . فإمتعض الشيخ عبداودود وكشر وبص لى من فوق لتحت كده وهز رأسه وتمتم بكلام مع نفسه ..

فرجع الخواجه وسألنى  قل لى  بقى خبيبى رأيك إيه ولا أنت مش مسلم زيو شيخ عبدالودود  ؟؟

فقلت له إسمع يا خواجه . انا مُسلم لكن مش زى شيخ عبدالودود ..انا النبى محمد عندى غير اللى عند  بخارى وإبن حنبل والشافعى ..

إنت يا خواجه كذاب ونصاب ، وكُل  كُتبك اللى حتستشهد بها فى المحاكم كذب فى كذب واونطه كتبوها شوية نصابين زيك بالظبط . .فزعل كده واحمر وجهه وقال إزاى خبيبى ؟؟

فقلت له اسمع يا خواجه   .اليهود تركوا يثرب اللى كانوا بيعيشوا فيها مع النبى محمد عليه السلام  ومع المسلمين قبل ما يموت بسنوات وسنوات ، لأسباب منها  .

السبب الأول أن الإسلام منع تجارة الرقيق والربا اللى كان بيعيش عليها اليهود ،لأنه طلب من المسلمين  تحرير العبيد وعتق الرقاب فى مناسبات كتيرة ،  وكفارات عن أخطاءهم  وخطاياهم ، وكمان  طلب منهم ان  يتصدقوا على بعض  ويساعدوا بعض ،و الأغنياء ينفقوا على الفقراء ،فضاعت فرصة التعامل بالربا  اللى كان بيتعامل بها اليهود .وبيعيشوا عليها ..

 والسبب الثانى – انهم خانوا النبى محمد وتحالفوا مع اعداءه ، وفتحوا لهم المدينة من الناحية اللى كانوا بيسكنوا فيها ،ونقضوا العهود والمواثيق المبرمة بينه وبينهم –فذهب بمجموعه من اصحابه ليرد إعتدائهم وخيانتهم ويدافع عن المسلمين فى المدينة او يثرب زى ما نت بتقول عنها ،فهرب اليهود خوفا وذعرا وحملوا اموالهم ومصوغاتهم الذهبية وبعض من متاعهم  ،وخرجوا برة المدينة .،فمنهم اللى راح اليمن اللى جدودك منها ، ومنهم اللى راح البحرين ،اللى ابو هريرة منها ،ومنهم اللى راح مصر ،واللى راح العراق .المهم انهم تركوا يثرب قبل ما يموت النبى  بسنوات .فكيف إستلف شعير من جدك اليهودى  يودى .ورهن درعه عنده ،وهم مش موجودين أصلا يا  خواجه  ؟؟؟

-وسبب ثالث --- النبى محمد عليه السلام .اللى انا أعرفه ،قبل وفاته بايام كان بيجهز جيش كامل علشان يدافع به عن يثرب خارج حدودها ويحميها من  المعتدين الأعراب المنافقين  الذين اغاروا عليها .وكان هذا الجيش بقيادة اسامة بن زيد ، ومات النبى قبل ما الجيش يخرج ،وخرج فى  اول عهد ابو بكر وده اللى بيقولوا عنه حروب الردة  ، فكيف كانت عنده قدرة مالية  يُجهز جيش كامل بمعداته وعتاده ،وما يقدرش يدفع ثمن 30 صاع من شعير طعام لبيته وناسه لا يزيد ثمنهم عن 30 درهم  ؟؟؟؟؟

وسبب رابع .. كُتب التاريخ يا خواجه بتقول .. ان النبى مُحمد عليه الصلاة والسلام .توفى وعنده ارض اسمها ارض الفدك ، والخلفاء من بعده  منعوا اهله وازواجه من ميراثها ، وكانت سبب  فى مُشكلة بين ابنته فاطمة الزهراء والخليفة  ابو بكر بسبب منعها من ميراثها ، ومن بعده عمر بن الخطاب منع توريث امهات المؤمنين اياها ، وجاء عثمان بن عفان واعطاها هدية لمروان بن الحكم الأموى ، وكانت سبب مشكلة بينه وبين ام المؤمنين عائشة ، وقالت له اتمنعنا من ميراثنا وتهبه لإبن الحكم ؟؟ وكانت بتقول عنه بسببها  اثناء الثورة عليه (إقتلوا نعثلا ) .

سبب خامس  . القرآن الذى أؤمن به وأُصدقه لأنه من عند رب العالمين يا خواجه  قال لنا عن النبى محمد انه كان عائلا فأغناه الله .((ووجدك عائلا فاغنى ))--  الضحى -8

وانه كان عنده بيوت ملكه   مفتوحة للمسلمين الفقراء يطلبوا فيها الأكل والشرب فى اى وقت ...(( -يا ايها الذين امنوا لا تدخلوا بيوت النبي الا ان يؤذن لكم الى طعام غير ناظرين اناه ولكن اذا دعيتم فادخلوا فاذا طعمتم فانتشروا ولا مستانسين لحديث ان ذلكم كان يؤذي النبي فيستحيي منكم والله لا يستحيي من الحق واذا سالتموهن متاعا فاسالوهن من وراء حجاب ذلكم اطهر لقلوبكم وقلوبهن وما كان لكم ان تؤذوا رسول الله ولا ان تنكحوا ازواجه من بعده ابدا ان ذلكم كان عند الله عظيما.)). الأحزاب  55.

-وانه كان له خمس من الفىء والغنائم .وهذا كاف له يعيش منه وزيادة .وكان بعض المسلمين المقتدرين يقدمون له صدقات وزكاة اموالهم .لُينفق منها ويوزعها على الفقراء ..((( يا ايها الذين امنوا اذا ناجيتم الرسول فقدموا بين يدي نجواكم صدقة ذلك خير لكم واطهر فان لم تجدوا فان الله غفور رحيم))) === المجادلة =12-

.. عايزنى بعد كده  يا خواجه أُكذب كلام ربنا ،واصدق هجصك وكدبك انت والبخارى وابن حنبل ؟؟؟

يا خواجه . نبى الله محمد  اللى أعرفه غير محمد اللى فى بخارى وخنبل بتاعك ، وما يعرفوش بعض ،وعمرهم ما تقابلوا  مع بعض ابدابدا ..

فقال الخواجه ..خبيبى انت حتودينى فى داخية ،وتضيع تعبى وسفرى ومستقبلى خبيبى  ...فضحكت وقلت انت سألتنى وانا جاوبتك .

فقال الشيخ عبدالودود – سيبك منه يا خواجه . بخارى صحيح ،وإبن حنبل صحيح . وهدا مسلم منكر سنة وكافر ..

فقلت له انت عارف انى اقدر ارفع عليك قضية  تمييز عنصرى ودعوة للإرهاب وتهديد حياتى  بكلامك ده هنا ، وارجعك بلدك حافى  مرة تانية .لكن مش حاعمل كده وحاسامحك  وادعو ربنا يهديك .

 

فقال الخواجه طيب انت شيخ عبدالودود  قل لى اعملو ايه خبيبى ؟؟.

فقال معلش يا خواجه حظك زفت .انت جيت  فى وقت صعب  والأنظمة الحاكمة الكافرة فى بلادنا مضيقه  الخناق على مشايخنا  بعد ضياع حلم الخلافة فى مصر  وتونس ، اصبر شوية كمان  واحنا حنشوف شيخ كبير زى الشيخ فيحان ، او الدكتور عمر حامد ،او الشيخ اسرائيل الخريفى . يقوم بحملة عالمية يدعوا فيها المسلمين  بالتبرع   لفك رهن درع النبى واسترداده ، وانا واثق ان اغنياء المسلمين مش حيبخلوا على فك رهن درع حبيبهم النبى ونديك فلوسك ونخلص منك ومن قرفك ..

فقال الخواجه . لا خبيبى دول كلهم  بقوا كروت مخروقة، والناس كلها  عرفوا انهم خرامية ونصابين خبيبى ..انا خاعمل كده بنفسى  ..

فضحكت وقلت ازاى حتعمل كده يا خواجه ؟؟

فقال – سهلة خبيبى . إخنا نروخو مصر  لشيخ أزهر  ونُعلن إسلام ،ونغير إسمو ،ونسمى نفسينا شيخ  عباس هلباوى .ونتعلم شوية عربى .وندفعو شوية فلوس لشيخ رئيس قناة  اهرازى  الدينية ونعملوا برنامج دينى ، ونتبنوا  فيه حملة عالمية كبيرة للتبرع لفك رهن درع نبى مخمد وإسترداده من يهود  ، وأجمع شوية فلوس كتير  ،واسافر بعدها على طول  .

فقلت له  طيب لما يطالبوك بالدرع  حتعمل لهم ايه ..

 فضحك وقال الدروع كتيرة خبيبى يختاروا اللى يعجبهم وياخدوه  ...

 

فضحكت ضحكة عالية قوى وساخرة . وقلت  صحيح جدودك زمان لبسوهم العمة بالبخارى وابن خنبل ،ودلوقتى أنت جاى تقلوظها  وتظبطها على مقاسهم  . رزق المهابيش على الطرابيش .ولا عزاء للخفافيش .

 

والى اللقاء مع إضحوكة  أخرى على طقطوقة من  طقاطيق  بخارى وإبن خنبل ..

اجمالي القراءات 10939

للمزيد يمكنك قراءة : اساسيات اهل القران
التعليقات (7)
1   تعليق بواسطة   لطفية سعيد     في   الثلاثاء 20 يناير 2015
[77201]

مشروع قصة قصيرة جيدة دكتور عثمان


السلام عليكم دكتور عثمان ، على رأي المقولة القائلة مع تعديل بسيط من عندي ،: ( سكت دهرا ، ونطق دررا ..)  هذا الصمت كان يحجب خلفه هذا المشروع القصصي الرائع .. ماذا اقول توظيف جيد للمعلومات في صورة قصصيية مكتملة العناصر من :  مكان وزمان وأحداث وعقدة وحل .. إذا كان الكلام من فضة فالسكوت  فعلا من ذهب ، ولكن لا تطيل فترة الصمت كثيرا .



أشكرك، ودمتم بخير   



2   تعليق بواسطة   عثمان محمد علي     في   الثلاثاء 20 يناير 2015
[77211]

شكر ا استاذة عائشة .


شكرا جزيلا استاذة عائشة حسين .على تعقيبك الكريم . وهى طريقة  نحاول من خلالها عرض المعلومة والهدف منها فى صورة خفيفة على نفس القارىء الكريم   ،وأتمنى أن تكون مُحببة له وأعجبته .وجعلتة يعيش القصة ،ويتفاعل معها بعيدا عن الإسلوب الأكاديمى الثقيل ، وخاصة اننا نبحث أمورا وموضوعات لا زالت محل تقديس عند كثير من المُسلمين ..اشكرك مرة أخرى ،وإن شاء الله نُذيع الخلقة التانية من بخارى وخنبل قريبا .هههههه



3   تعليق بواسطة   مراد الخولى     في   الأربعاء 21 يناير 2015
[77220]

حقك ضاع يا عم



أهلا دكتور عثمان:


عندى رد لخبيبى هذا " حقك اتحرق ياااااااااااااه " (ضحكة محششين) هههه.


 



4   تعليق بواسطة   عثمان محمد علي     في   الخميس 22 يناير 2015
[77230]

والله زمان استاذ مراد الخولى .


اهلا بك استاذ مراد الخولى .. والله زمان ، فينك يا صديقى العزيز ؟؟ وحشتنا مقالاتك ودراستك فى الإعجاز العددى للقرآن الكريم ....



على فكرة ما تقلقش .. الخواجة اكيد عنده اساليب أخرى يكسب بها قضايا حيرفعها على اتباع بخارى وخنبل خبيبى . ههههههههههههههههه.. دول ناس فى الطراوة خالص .. وزى ما بيقول اخونا الحبيب إبراهيم دادى- فى مقالاته الأخيرة  (البخارى وخنبل هههههه) هم اكثر ناس اساءوا للنبى محمد عليه الصلاة والسلام..



تحياتى ومنتظرين مقالاتك وتعقيباتك الجميلة .



5   تعليق بواسطة   محمد ابوأية     في   الجمعة 23 يناير 2015
[77263]

شكر وتحية إليك أخي عثمان


القصة معبرة فيها نوع من الفكاهة لكنها تكشف المستور وتفضح الخونة أعداء الحق،وأرجو من أصحاب التمثيل كعادل إمام وغيره أن يقوموا



بدورهم كفنانين لتنوير الشعوب المغفلة:



لقد كتبت تعليق بعنوان من أنت حتى تنتقد البخاري وأشرت فيه إلى أنه لسنا بحاجة إلى البحث في تراث الأديان الأخرى،



ونرجو من أخينا رضا البطاوي أن يركز على التراث الإسلامي فقط،وشكرا



تحياتي



6   تعليق بواسطة   عثمان محمد علي     في   الجمعة 23 يناير 2015
[77265]

اشكرك استاذ ابو آية


اشكرك استاذ ابو آية ..ووفقنا الله جميعا وهدانا لفهم دينه وقرآنه الكريم .



7   تعليق بواسطة   محمد ابوأية     في   الأحد 01 فبراير 2015
[77424]

أضم صوتي إلى صوتك


تحياتي:أخي الدكتور عثمان أنا أسف لهجوم الأخ سعد على الأستاذة نهاد وردها أيضا ؟؟وقد قلت من قبل إننا أصحاب رسالة عظيمة فلا ننزل إلى مستوى كهذا ونبهت الجميع أننا في سباق مع الزمن ولكل منا الحق في إبداء الرأي وتقديم البضاعة والناس تختار كما يجب الإلتزام بشروط النشر ويكفينا شرفا أننا  نكتب في مواقع أخرى ولنا تأثير كبير وفعال حتى في أوساط الملحدين والعلمانيين والعقلانيين وأصحاب أديان أخرى،وهذا الموقع شريف بإسمه فلا يصح أن يكتب فيه ما يخدش الحياء أو يكون سببا في نفور الناس منه نعم علينا مسؤولية كبيرة في تبليغ رسالة المحبة والحرية والإنسانية شكرا ..المارد الحر



أضف تعليق
لا بد من تسجيل الدخول اولا قبل التعليق