تعرف على أشهر 17 نكتة لاحقت رؤساء مصر

تعد النكات إحدى أهم الوسائل التى يعبر بها المصريون عن سخطهم من الواقع بصورة ساخرة، فالوضع السياسي شأنه شأن الأوضاع الاجتماعية والمعيشية والاقتصادية التي يتمرد عليها المواطنون، لذلك طالها العديد من النكات السياسية التي طاردت رؤساء مصر، خاصة آخر أربعة.

 

وجاء الرئيس الأسبق حسني مبارك في المركز الأول، من حيث نصيبه في النكت السياسية، يليه الدكتور محمد مرسي ومن ثم المستشار عدلي منصور  فالرئيس عبدالفتاح السيسي.

 

 مبارك

بيقولك مبارك قال لنظيف عاوز آخد رأيك فى حاجة

قاله:  أمرك يا ريس ..

الريس: أنا الأفضل ولا عبدالناصر؟..

نظيف: انت طبعًا يا ريس.. جمال مين اللى كان بيخاف من الروس..

طيب أنا الأفضل ولا السادات؟..

نظيف: انت طبعا يا ريس.. سادات مين يا ريس اللى كان بيخاف من الأمريكان ..

طيب أنا الأفضل ولا عمر بن الخطاب؟ ..

انت طبعا يا ريس.. عمر بن الخطاب كان بيخاف من ربنا.. انت لأ..

 

 

بيقولك حسني كان عاوز يغير دولارات ومش لاقي في السوق، فراح منادي نظيف: مفيش دولارات في السوق ليه يا نظيف انت نظفت السوق؟ ..

نظيف: الحج والعمرة يا باشا خلصوا على الاحتياطي ..

بقولك إيه: حج إيه وبتاع إيه.. من السنة الجاية الحج يبقى في مصر ..

يا باشا.. ازاي بس ..

اتصرف ..

بعد يومين رجع نظيف وقاله: كله تمام يا باشا خلاص الحج هيبقى عندنا..

الريس: طب والكعبة هتعمل فيها إيه؟ 

نظيف: هنعملها في ميدان الحجاز - مصر الجديدة ويبقوا يلفوا حواليها -

الريس: طب والسعي؟ 

يا باشا يبقوا يجروا في طريق صلاح سالم لغاية المطار ويرجعوا.

الريس: وعرفة؟

يطلعوا المقطم يا باشا. 

الريس: طب ورجم إبليس يا فالح؟

اتعب معانا شوية بقى يا ريس......

 

 

بيقولك مبارك لما كان فى سرير المرض قال لنظيف: وصيتك الحكم من بعدى يا نظيف ..

فى رقبتى يا ريس.. كله تمام والسلطة هياخدها جمال ..

(ثم راح فى غيبوبة.. أفاق منها بعد قليل)

وصيتك الشعب من بعدى يا نظيف

 ما تخافش يا ريس .. الشعب ياكل الزلط ...

(ثم راح فى غيبوبة.. أفاق منها بعد قليل )

نظيف

نعم يا ريس

ماتنساش.. توكيل الزلط لعلاء....

 

 

 واحد لقى مصباح علاء الدين ودعكه.. فطلع الجني وقاله انت تطلب إيه؟

قاله: تطلع أمريكا من العراق..

 الجني: بس أنا مليش دعوة بالسياسة..

قال: طيب أنا خريج 1999 وعايز شغل..

الجني: تحب اطلع أمريكا من العراق إمتى؟..

 

 مبارك جمع شيخ الأزهر والبابا شنودة، وقالهم أنا جمعتكم النهارده علشان أقولكم إن ابنى جمال هيبقى رئيس مصر سنة 2010..

قام البابا شنودة، وقال اللهم صل ع النبى..

شيخ الأزهر قاله: انت كده أسلمت يا شنودة؟

شنودة قاله: ما هى حاجة تخلى الواحد يطلع عن دينه.

 

بيقولوا للريس قبل الانتخابات: "انت مش هاتودع الشعب ولا إيه"؟

قالهم "ليه هو الشعب رايح فين"؟ 

 

واحد بيقول لمبارك: يا ريس أنا بعت قيراط الأرض اللي حيلتي علشان أوظف الواد ومتوظفش..

مبارك قاله: أنا بعت مصر كلها علشان أوظف جمال ومتوظفش.

 

 

مرسى

واحد بيقول للتانى هو صحيح الرئيس مرسى كان مسجون فى قضيه تجسس وممنوع من السفر..

رد عليه التانى وقالوا: أيوا بس مش عارف أخد براءة ولا إعفا.

 

واحد بيقول للتانى هو محمد مرسى وأبو إسماعيل قرايب..

رد عليه التانى، وقاله: دول قرايب من الدرجة الأولى، الاتنين كانوا عايزين الكرسى وعياله طلعوا أمريكان وبقى ريس..

والتانى أمه طلعت أمريكية وهو مكانش يعرف.

 

 بيقولك وزير المواصلات راح يسأل مرسى بعد ما شالوا من الوزارة، وقاله: عايز أعرف انت شيلتنى ليه يا ريس؟..

قاله: يا حبيبي التغيير سُنة الحياة..

قاله: طيب شيلت ليه كمال الجنزورى وطنطاوى وعنان..

قاله: يا حبيبي التغيير سُنة الحياة..

قاله: طيب ممكن أسالك سؤال، أمال ليه المرشد الوحيد اللى ماتغيرش؟..

قاله: يا حبيبي تغييركم انتم سُنة، لكن المرشد وجوده فرض.

 

 مرسى: عارف يا إبليس يا اخويا، أنا عاوز أعمل في الشعب المصري حركة تطلع من نافوخه..

إبليس: طب هات ودنك وخد الفكرة دي.. وش وش وش وش..

مرسى: لالا يا إبليس الفكرة دي مش نافعة، عاوز حاجة أشد

إبليس: طب خد دي... وش وش وش وش

مرسى: لا لا، برضه مش نافعة..

إيه يا إبليس انت بقيت خرع كده ليه..

هات بقه ودنك وأنا أقولك أنا نويت أعمل فيهم إيه..وش وش وش وش وش

إبليس : لا يا راجل اتق الله......

 

مرة مرسى راح مدرسة ابتدائى فلما جت فترة الأسئلة ولد رفع إيده

مرسى سأله اسمك إيه؟..

فقاله: رامى..

قاله: إيه سؤالك يا رامى؟

رامى: أنا عندى أربعة أسئلة.

 ليه انت رئيس للإخوان بس؟

 ليه معملتش مجلس شعب؟

 ليه أهلك وعشيرتك وجماعتك ماسكين كل حاجة فى البلد؟

 ليه مصر حالتها الاقتصادية زفت وانت مبتعملش حاجة؟

ساعتها بالظبط رن جرس الراحة وبعد الراحة رجع مرسى وقال احنا كنا فين بقى؟

مين عنده سؤال؟

ولد صغير تانى رفع إيده، فمرسى سأله اسمك إيه؟..

قاله: تامر..

فقاله: سؤالك إيه يا تامر؟

تامر: أنا عندى أسئلة

ليه انت رئيس للإخوان بس؟

ليه معملتش مجلس شعب؟ 

 ليه أهلك وعشيرتك وجماعتك ماسكين كل حاجة فى البلد؟

 ليه مصر حالتها الاقتصادية زفت وانت مبتعملش حاجة؟

 ليه جرس الراحة رن ربع ساعة بدرى؟

  فين رامى؟

 

 

عدلى منصور

بيقولك: مرة اتصل الملك السعودى برئاسة الجمهورية، فرد عليه الرئيس عدلى منصور..

قاله: ادينى السيسى..

ثم اتصل ملك الكويت.. فرد عليه عدلى منصور..

قاله: ادينى السيسى..

ثم اتصل الرئيس الفرنسي.. فرد عليه عدلى منصور..

قاله: ادينى السيسى..

فاضايق عدلي منصور وأخيراً اتصل أوباما وقاله الرئيس عدلي منصور معايا..

فرد عليه  منصور بكل فخر، أيوه الرئيس عدلي معاك..

فقاله: أوباما، طيب اديني السيسى.

 

مرة عدلي منصور نزل بالعربية بتاعته يشترى أدوية خلال فترة حظر التجول..

فوقفه ضابط شرطة وسأله، انت رايح فين وإيه اللى نزلك فى الوقت ده، انت مش عارف إنى فيه حظر تجول؟..

قاله: أنا نازل يابنى أجيب أدوية لمراتى علشان عيانة..

قاله: طلع بطاقتك..

الراجل طلع بطاقته واداها للضابط..

لقى اسمه فى البطاقة عدلى منصور..

قاله: روح يابا مش عاوزين مشاكل...

 

السيسى

 واحد قال لصاحبه قبل تعيين السيسى لوزارة محلب: عارف الوزارة الجاية هيبقى شعارها إيه؟..

قال: له لأ ..فقال له "الدهن في العتاقي".

 

محمد نصار

مصر العربية